ՀՀ տրանսպորտի, կապի եւ տեղեկատվական տեխնոլոգիաների նախարար Աշոտ Հակոբյանն ընդունել է Ասիական զարգացման բանկի (ԱԶԲ) պատվիրակությանը` թիմի ղեկավար Թոմաս Հերցի գլխավորությամբ։ Այս մասին տեղեկացնում են ՀՀ տրանսպորտի, կապի եւ տեղեկատվական տեխնոլոգիաների նախարարության
լրատվական ծառայությունից:
Ողջունելով հյուրերին` նախարարը ուրախությամբ հայտնեց, որ համատեղ ջանքերը զգալի արդյունք են տվել, եւ «Հյուսիս-հարավ ճանապարհային միջանցք» ներդրումային ծրագրի Տրանշ 3-ում աշխատող չինական «Սինոհիդրո» ընկերությունը ակտիվացրել է շինարարությունը։
ԱԶԲ ներկայացուցիչը նույնպես գոհունակությամբ ընդգծեց, որ ընկերության հետ կապված խնդիրները մեծամասամբ լուծվել են։ Նա նշեց, որ իրենց դիտարկման արդյունքում չինական ընկերության կողմից իրականացվող շինարարության տեմպերը շուրջ 5 անգամ ավելացել են։
Նախարարն ասաց, որ այս պահին Տրանշ 2-ում` իսպանական ընկերության կողմից իրականացվող բետոնապատման աշխատանքները նվազեցվել են, որպեսզի հնարավոր լինի որակի պատշաճ վերահսկում իրականացնել։
Նախարարի խոսքով՝ անհրաժեշտ է ԱԶԲ-ի աջակցությունը, որպեսզի համատեղ ջանքերով լիարժեք ուսումնասիրություն կատարվի բետոնապատված հատվածներում՝ առկա ճաքերի պատճառները լիարժեք վեր հանելու ուղղությամբ եւ պարզելու՝ արդյոք միայն ցեմենտի բարձր թթվայնությու՞նն է դրա հիմնական պատճառը, եւ այն նվազեցնելու ու պահանջվող մակարդակի հասնելու դեպքում այդպիսիք արդյոք կբացառվե՞ն, թե՞ կարող են լինել նաեւ ճաքերի այլ պատճառներ, որոնք անհրաժեշտ է այս պահին պարզել եւ միջոցներ ձեռնարկել նաեւ այդ ուղղությամբ:
Բանկի ներկայացուցիչը նշեց, որ իրենք միակարծիք են եւ պատրաստ են աջակցել։
Աշոտ Հակոբյանը Թոմաս Հերցի հետ քննարկեց նաեւ ծրագրի շարունակականության հարցը։ Վերջինս հայտնեց, որ ԱԶԲ-ն պատրաստակամ է երկարաձգել ու շարունակել ծրագիրը։ Խոսվեց Տրանշ 4-ում եւ 5-ում ԱԶԲ ներգրավվածության հեռանկարների մասին:
Կողմերը քննարկեցին նաեւ միջազգային տնտեսական կլոր սեղան- համաժողովի` Հայաստանում անցկացման հնարավորությունները։