Սեուլն ու Փհենյանը պայմանավորվել են նոյեմբերի 22-ին հանել ընդհանուր սահմանի պահակակետերը: Այս մասին հայտնել է Հարավային Կորեայի պաշտպանության նախարարությունը, փոխանցում է Reuters-ը:
Պայմանավորվածությանը հասել են անցյալ ամիս Հյուսիսային Կորեայի մայրաքաղաքում ձեռք բերված համաձայնագրի շրջանակում, որը կոչ է անում դադարեցնել «բոլոր թշնամական գործողությունները»:
Հարեւանները համաձայնվել են առաջին փուլում սահմանի յուրաքանչյուր կողմում 1 կմ սահմաններում վերացնել 11 պահակակետեր եւ այնտեղ տեղակայված սարքավորումներն ու անձնակազմին դուրս բերել նոյեմբերի վերջին: «Այս միջոցառումները կավարտվեն դեկտեմբերին փոխադարձ ստուգմամբ»,- նշված է հայտարարության մեջ:
Բանակցությունները գլխավորել են Հարավային Կորեայի գեներալ-մայոր Կիմ Դո Գյունը եւ Հյուսիսային Կորեայի գեներալ-լեյտենանտ Ան Իկ Սանը Փհանմունջոմ սահմանային գյուղում: Երկու կողմերը քննարկել են նաեւ համատեղ ռազմական հանձնաժողովի վերականգնման հարցը: