«Սասնա ծռեր» խմբի անդամ Արայիկ Խանդոյանը պետք է հետմահու արդարացվի, իսկ նրա այրին՝ Անուշ Խանդոյանը պետք է ներգրավվի, որպես նրա իրավահաջորդ: Այս մասին այսօր՝ հոկտեմբերի 31-ին, Երեւանի ընդհանուր իրավասության դատարանի Շենգավիթի նստավայրում հայտարարեց Խանդոյանի պաշտպան Արա Ղարագյոզյանը:
Հիշեցնենք, որ որ Արայիկ Խանդոյանը մահացել է հոկտեմբերի 9–ի լույս 10–ի գիշերը Գյումրիում՝ սրտի կաթվածից։
ՊՊԾ գնդի գրավման գործով այսօրվա հերթական նիստում Ղարագյոզյանը միջնորդեց՝ դատարան հրավիրել Արայիկ Խանդոյանի կնոջը՝ Անուշ Խանդոյանին, որպեսզի նա դիրքորոշում հայտնի ամուսնու վերաբերյալ քննվող քրեական գործի վարույթը կարճելու կամ շարուանակելու վերաբերյալ: Պաշտպանը միաժամանակ միջնորդեց Անուշ Խանդոյանին, գործով ներգրավվել, որպես տուժողի իրավահաջորդ:
Ըստ պաշտպանի՝ Խանդոյանի մասով գործի քննությունը պետք է շարունակվի:
«Խանդոյանը շուրջ երկու տարուց ավելի գտնվել է կալանքի տակ և նրա խախտված իրավուքններն այս գործի շրջանակներում պետք է վերականգնվեն, նա պետք է արդարացվի»,-ասաց փաստաբանը:
Նախագահող դատավոր Մեսրոպ Մակյանը պաշտպանին խնդրեց դատարանին ներկայացնել Խանդոյանի մահվան վկայականը և որոշում կայացրեց ծանուցել նրա կնոջը՝ Անուշ Խանդոյանին:
Հիշեցնենք, որ Արայիկ Խանդոյանը կալանավորվել էր 2016թ. հուլիսի 17-ին ՊՊԾ գունդ գրավելու, պատանդ պահելու եւ զենք-զինամթերք օգտագործելու մեղադրանքով։ 2018 թ. օգոստոսի 18–ին դատարանի որոշմամբ փոխվել էր Խանդոյանի խափանման միջոց կալանավորումը. նա ազատ էր արձակվել պատգամավորների անձնական երաշխավորությամբ։
Ազատամարտիկ, «Սասնա Ծռեր» խմբի անդամ Արայիկ Խանդոյանը հուղարկավորվել է հոկտեմբերի 14-ին, «Եռաբլուր» զինվորական պանթեոնում:
