ՀՅԴ վարկանշային ցուցակով առաջադրվելու են Ռուզան Առաքելյանը, Արմենուհի Կյուրեղյանը, Արտաշես Շահբազյանը։ Այս մասին NEWS.am–ի հետ հարցազրույցում ասաց ՀՀ ԱԺ ՀՅԴ խմբակցության պատգամավոր Ռուզան Առաքելյանը։

Մյուս թեկնածուները եւ նախընտրական ցուցակի դասավորվածությունը առայժմ պարզ չեն։ Առաքելյանը միայն ասաց, որ ցանկում երիտասարդներ եւ նոր անուններ են լինելու։ Համամասնական ցուցակ կընդգրկվեն նաեւ անկուսակցական գործարարներ, որոնք կիսում են Դաշնակցության գաղափարները։

Ռուզան Առաքելյանը «ռեյտինգայինով» առաջադրվելու է Նոր Նորք, Քանաքեռ–Զեյթուն համայնքներն ընդգրկող ընտրատարածքից։ Նույն տեղից առաջադրվելու է նաեւ «Լուսավոր Հայաստանից» ՔՊ տեղափոխված ԱԺ պատգամավոր Հայկ Կոնջորյանը։

Դաշնակցական պատգամավորը կարծում է, որ ՀՅԴ–ն կհաղթահարի անցողիկ շեմն ու կմտնի խորհրդարան։ Ասում է՝ իրենց խմբակցությունը, եթե անգամ ամենամեծը չի եղել, բայց եղել է ամենաակտիվներից։

Եթե ՀՅԴ–ն չանցնի Ազգային ժողով, գործունեությունը կշարունակի արտախորհրդարանական ընդդիմության դերում։

«Իբրեւ արտախորհրդարանական քաղաքական ուժ միշտ ներկայություն ենք լինելու Հայաստանում, տարբեր մեթոդներով մեր ձայնը բարձրացնելու ենք. գուցե նաեւ ոչ հրապարակներում, այլ հոդվածներով, լրատվամիջոցներով»,–ասաց Ռուզան Առաքելյանը։

Նա հիշեցրեց, որ իրենք արդեն եղել են արտախորհրդարանական ընդդիմություն. «Երբ ՀՀ 1–ին նախագահի որոշմամբ փակվեցին ՀՅԴ թերթերը, Դաշնակցությունը հրապարակային գործունեության հարթակ չուներ, բայց ամեն ինչ անում էր, որ իր ձայնը լսվի եւ լսվում էր»։

Հարցազրույցի մանրամասները՝ տեսանյութում։