Դեկտեմբերի 1-ին ԳԴՀ Բրանդենբուրգ երկրամասի գիտության, կրթության և մշակույթի նախարարության, Գերմանիայում Հայաստանի դեսպանության և Պոտսդամի ֆիլմերի թանգարանի նախաձեռնությամբ Պոտսդամում բացվեց Փարաջանովի ստեղծագործությունների ցուցահանդեսը, որը կտևի մինչև 2019թ. հունվարի 16-ը: Ցուցահանդեսին զուգահեռ թանգարանի ֆիլմերի սրահում կցուցադրվեն նաև Փարաջանովի ֆիլմերը:
Ցուցահանդեսի բացմանը մասնակիցներին ողջունեցին Պոտսդամի ֆիլմերի թանգարանի տնօրեն պրոֆ. Ուրսուլա ֆոն Քայցը (Ursula von Keitz), Բրանդենբուրգ երկրամասի գիտության, կրթության և մշակույթի նախարար դր. Մարտինա Մյունխը (Martina Münch) և Գերմանիայում Հայաստանի դեսպան Աշոտ Սմբատյանը:
Դեսպանը նշեց, որ ցուցահանդեսի խորագիրը` «Արվեստ՝ առանց սահմանների», արդեն իսկ խոսում է Փարաջանովի արվեստի բազմազանության, խորության և անսահմանության մասին:
Մինչ այս՝ նոյեմբերի 20-30-ը, Գերմանիայում Հայաստանի դեսպանության, Բեռլինի «Արսենալ» կինոթատրոնի և գերմանական Հայնրիխ Բյոլ հիմնադրամի նախաձեռնությամբ կազմակերպվեց Փարաջանովի ֆիլմաշարի ցուցադրումը Բեռլինի «Արսենալ» կինոթատրոնում:
Փարաջանովին նվիրված 10-օրյա միջոցառման շրջանակում (Hommage) բեռլինյան հանդիսատեսին ներկայացվեցին նրա կինոարվեստն ու նրա ստեղծագործությունները:
Նոյեմբերի 30-ին տեղի ունեցավ փառատոնի փակման արարողությունը, որին հրավիրված էին նաև Փարաջանովի տուն-թանգարանի տնօրեն Զավեն Սարգսյանը և Վրաստանից` Թեո Խատիաշվիլին, որը թեկնածուական թեզ է պաշտպանել Փարաջանովի ստեղծագործությունների մասին:
Միջոցառման ավարտին ցուցադրվեց Փարաջանովի «Նռան գույնը» ֆիլմը: