Հայաստանի Կենտրոնական ընտրական հանձնաժողովը հսկայական ծավալի աշխատանք է կատարել երկրում արտահերթ խորհրդարանական ընտրությունները կազմակերպելու համար։ Այդ մասին այսօր, դեկտեմբերի 6-ին լրագրողների հետ հանդիպմանն ասաց ԱՊՀ դիտորդական առաքելության ղեկավար Վիկտոր Գումինսկին։
Նրա խոսքերով՝ ԿԸՀ նախագահ Տիգրան Մուկուչյանի հետ հանդիպման ժամանակ ինքը տեղեկացվել է արտահերթ խորհրդարանական ընտրությունների պատրաստման ընթացքի մասին։
«Հաշվի առնելով, որ Հայաստանի Կենտրոնական ընտրական հանձնաժողովը աշխատել է սեղմ ժամկետում, նրան հաջողվել է պատշաճ մակարդակով կատարել 2018թ․ դեկտեմբերի 9-ի արտահերթ խորհրդարանական ընտրությունների անցկացման համար անհրաժեշտ կազմակերպչական աշխատանքները։ Ստեղծվել են բոլոր պայմանները, որպեսզի Հայաստանի քաղաքացիները կարողանան ազատ դրսեւորել իրենց կամարտահայտությունը»,- ընդգծեց դիտորդական առաքելության ղեկավարը։ Գումինսկին նշել է բոլոր քաղաքական ուժերի համար հավասար հնարավորությունների առկայության կարեւորությունը։
«Անհրաժեշտ է ընդգծել քարոզարշավի ընթացքում մամուլի զանգվածային միջոցների դերը, ինչպես նաեւ քաղաքական ուժերի համար հեռուստատեսությամբ, ռադիոյով եւ կոմունիկացիոն զանգվածային այլ միջոցներով իրենց ծրագրերը ներկայացնելու հավասար հնարավորությունների առկայությունը»,- ասաց նա։
Գումինսկին ընդգծեց քաղաքական երկխոսության, այդ թվում՝ բանավեճերի անցկացման կարեւորությունը, ինչը նպաստում է նրան, որ ընտրողները քաղաքական գործիչներից տեղեկատվություն ստանալու հնարավորություն ունենան։
«Դիտորդական առաքելությունը, որ կազմված է 84 փորձառու եւ որակավորված դիտորդներից, իր աշխատանքը սկսել է 2018թ․ նոյեմբերի 22-ին։ Առաքելությանը մասնակցելու հրավերին արձագանքել են ԱՊՀ բոլոր երկրները, բացի Ադրբեջանից (հայտնի պատճառներով) եւ Ուկրաինայից, որը 2015թ․ հոկտեմբերի 7-ին հայտարարել է, որ չի մասնակցելու դիտորդական առաքելություններին»,- հայտարարեց Վիկտոր Գումինսկին։
