Ստեփանավանում կորել է մեր կուսակցության մոտ 60 քվեաթերթիկ: Դեկտեմբերի 11-ին լրագրողների հետ հանդիպման ժամանակ այս մասին ասաց «Քրիստոնեա-ժողովրդական վերածնունդ» կուսակցության ղեկավար Լեւոն Շիրինյանը:
Նրա խոսքով, սակայն, սա ընտրությունների արդյունքների վրա էական ազդեցություն չի ունեցել: «Մենք չենք ցանկանում փչացնել ո՛չ հաղթած քաղաքական ուժի, ո՛չ մեծաթիվ քաղաքացիների տրամադրությունը: Մենք միայն փաստն ենք գրանցում»,- նշեց Շիրինյանը: Նրա կարծիքով՝ իրավիճակը պետք է պարզի Կենտրոնական ընտրական հանձնաժողովը: «Մենք բողոք չենք ներկայացնի, այս դեպքում դա մեզ համար սկզբունքային չէ: Սակայն այդ փաստը վկայում է մեր կուսակցության դեմ ուղղված գործողությունների մասին»,- հավելեց քաղաքական գործիչը:
Նրա գնահատմամբ՝ ստացած ավելի քան 6 հազար ձայնը լավ երաշխիք է գաղափարների առաջմղման եւ ծրագրային բազայի զարգացման համար: «Հայաստանի նորագույն քաղաքական պատմության մեջ առաջին անգամ քաղաքական կուսակցությունը համալրվել է պրոֆեսիոնալ քաղաքագետներով, տնտեսագետներով, իրավաբաններով»,- ասաց ՔԺՎ ղեկավարը:
Լեւոն Շիրինյանը հստակեցրեց, որ իր կուսակցությունը չի լրացնի «փողոցային», արտախորհրդարանական ընդդիմության շարքերը: «Մենք այլընտրանքային քաղաքական ուժ կլինենք: Մտադիր ենք բարձրացնել երկրի քաղաքական համակարգի մակարդակը, առաջարկել նոր քաղաքական, սոցիալ-տնտեսական, մշակութային հայեցակարգեր»,- հստակեցրեց կուսակցության ղեկավարը:
Շիրինյանը նշեց, որ նախընտրական ժամանակաշրջանում երկու միտում է պարզվել: «Առաջին՝ որոշ լրատվամիջոցներ մեզ դասել են կրոնական կազմակերպություններին, չնայած դա այդպես չէ: Մենք քաղաքական կուսակցություն ենք, մեր գաղափարախոսության հիմքում դրված են քրիստոնեական արժեքները: Երկրորդ՝ կուսակցությանը սկսեցին նույնականացնել իմ անձի հետ, ինչպես տեղի է ունենում Հայաստանի քաղաքական իրականության մեջ»,- եզրափակեց նա:
Հիշեցնենք, որ դեկտեմբերի 9-ին տեղի ունեցան արտահերթ խորհրդարանական ընտրություններ, որի արդյունքներով «Լուսավոր Հայաստան» կուսակցությունը երրորդ տեղում է՝ երկրորդ տեղը զիջելով «Բարգավաճ Հայաստանին»: Կանխատեսելիորեն առաջին տեղը զբաղեցրել է «Իմ քայլը» դաշինքը: «Քրիստոնեա-ժողովրդական վերածնունդ» կուսակցությունը ստացել է ընտրողների ձայների 0,51 տոկոսը:
