Սիրիայից զորքերի դուրս բերման մասին Վաշինգթոնի որոշումը մտահոգության տեղիք է տալիս: Այս մասին դեկտեմբերի 24-ին՝ լրագրողների հետ հանդիպման ժամանակ, ասաց ՀՅԴ Բյուրոյի Հայ Դատի եւ քաղաքական հարցերի գրասենյակի պատասխանատու Կիրո Մանոյանը:
Նրա խոսքով, այս որոշումը նոր հնավորություններ կբացի Թուրքիայի համար զորքերը Սիրիայի տարածք մտցնելու տեսանկյունից:
«Թուրքական զորքերի ներթափանցումը կկատարվի երկրի հյուսիսային եւ արեւելյան շրջանների ուղղությամբ, որոնք վերահսկվում են քրդերի կողմից: Սիրիայի այդ շրջաններում կենտրոնացած է հայ բնակչությունը: Մասնավորապես, վտանգ կարող է առաջանալ Էլ Կամիշլի քաղաքի բնակչության համար»,- ասաց նա:
Կիրո Մանոյանը նշեց այն փաստի կարեւորությունը, որ նման որոշումն ընդունվել է ԱՄՆ-ի եւ Թուրքիայի նախագահների հեռախոսազրույցի ժամանակ եւ այն Վաշինգթոնի իշխանությունների կողմից միաձայն չի ընդունվել:
«Այս կապակցությամբ մենք մտահոգության մի քանի պատճառ ունենք: Նախ, Սիրիայի տարածքում հայ բնակչության ներկայությունը, ուր կարող են թուրքական զինված ուժերը ներթափանցել: Երկրորդ, այն փաստը, որ այս ամենը տեղի կունենա մեր սահմաններից համեմատաբար մի փոքր հեռու», - նշեց նա:
