ԱՄՆ-ն պահանջում է, որ Հարավային Կորեան ամեն տարի 1.2 մլրդ դոլար վճարի թերակղզում ամերիկյան զորքերի տեղակայման համար, ինչն ավելի քան 40 տոկոսով ավելին է, քան այն գումարը, որն այժմ Սեուլը վճարում է 28 500 ամերկացիների գտնվելու համար, գրում է Telegraph-ը:
Վաշինգթոնի պահանջը փոխանցվել էր դեկտեմբերին՝ այս հարցով բանակցությունների վերջին փուլի անցկացման ժամանակ, թեեւ այդ ժամանակվանից Սեուլում ԱՄՆ դեսպանը, ինչպես հաղորդվում է, ակնարկել է, որ Վաշինգթոնը մերժման դեպքում կարող է վերանայել բարեկամության մասին համաձայնագիրը:
Կորեական ԶԼՄ-ների տվյալներով, նման դիրքորոշումը զայրացրել է Հարավային Կորեայի ղեկավարությանը, որը հայտարարել է, որ կարող է առավելագույնը 886 մլն դոլար վճարել:
The Korean Times-ը ԱՄՆ-ին մեղադրել է Սեուլին վերջնագիր ներկայացնելու համար:
Նշելով, որ Վաշինգթոնը նախկինում Սեուլից վճարների նման կտրուկ աճ չէր պահանջել, հրապարակման մեջ նշվում է, որ պահանջը չափազանց մեծ է: «Ավելի լուրջ է այն, որ Թրամփի վարչակազմը փորձում է Հարավային Կորեայի եւ ԱՄՆ-ի միջեւ փոխադարձ պաշտպանության մասին պայմանագիրը օգտագործել որպես լծակ, որպեսզի իր դաշնակցին ստիպի ընդհանուր ծախսերի կեսից ավելին կրել»:
ԱՄՆ դեսպանի պահանջը «կարող է որպես շանտաժ կամ սպառնալիք դիտարկվել, եթե Սեուլը չկատարի ԱՄՆ-ի պահանջը», գրում է թերթը:
Հարավային Կորեայի կառավարությունը պաշտոնապես հրաժարվել է մեկնաբանել ԱՄՆ-ի պահանջներն այն հիմնավորմամբ, որ քննարկումները շարունակվում են: