Միջազգային հանրությունը ղարաբաղյան հակամարտության ոչ ուժային կարգավորման կոնսենսուս ունի: Հունվարի 30-ին Երեւանում Ալեքսանդր Սերգեյեւիչ Գրիբոյեդովի կիսանդրու բացման հանդիսավոր արարողությունից հետո լրագրողների հետ զրույցում ասաց Ռուսաստանի ԱԳ փոխնախարար Գրիգորի Կարասինը:
Նրա խոսքով՝ առանց բացառության բոլոր երկրները, միջնորդների հիմնական եռյակը՝ Ռուսաստանի Դաշնությունը, Ամերիկայի Միացյալ Նահանգները եւ Եվրամիությունը (որին ներկայացնում է Ֆրանսիան – խմբ.) միակարծիք են, որ ուժային սցենարները պետք է կտրականապես բացառվեն:
ՌԴ ԱԳ փոխնախարարը նշեց, որ Հայաստանի եւ Ադրբեջանի ղեկավարների հանդիպումների շնորհիվ վերջին ամիսներին հաստատվել է համեմատական հանդարտություն եւ «հատկանշական է դարձել իրադրության կանխատեսելիությունը»: «Առջեւում նոր հանդիպումներ են, իմ ընկալմամբ՝ այդ հանդիպումները կանցկացվեն տարբեր մակարդակներով՝ ինչպես ԱԳ նախարարությունների, այնպես էլ 2 երկրների առաջնորդների: Հանդիպումները պետք է լավ նախապատրաստվեն, որպեսզի սուբստանտիվ լինեն, իրական արդյունքներ եւ առաջընթաց ապահովեն: Հիմա չափազանց կարեւոր է, որպեսզի Լեռնային Ղարաբաղի հիմնախնդրի շուրջ իրադրությունը լինի կանխատեսելի եւ հանգիստ»,- շեշտեց Կարասինը:
