Եվրամիությունը շահագրգռված է արաբական աշխարհի կայունությամբ: Այս մասին Գերմանիայի կանցլեր Անգելա Մերկելը հայտարարել է պատմության մեջ առաջին՝ Եվրամիության եւ Արաբական պետությունների լիգայի համատեղ գագաթնաժողովի ժամանակ, որն ընթանում է Շարմ էշ Շեյխում: «Եվրամիության ճակատագիրն ուղղակիորեն կախված է ԱՊԼ երկրների ճակատագրից»,- շեշտել է Գերմանիայի կանցլերը, փոխանցում է DW-ն:
Գերմանիայի կացլերն իր ելույթում անդրադարձել է տարածաշրջանում միգրացիայի թեմային եւ իսլամական ահաբեկչության դեմ պայքարին, ինչպես նաեւ կրկին Սիրիայում խաղաղ գործընթացի կոչ է արել: Դրանից բացի, Մերկելը հատուկ առանձնացրել է Իսրայելի՝ գոյություն ունենալու իրավունքը եւ ընդգծել Մերձավոր Արեւելքում Գերմանիայի անփոփոխ դիրքորոշումը:
Եվրամիությունը հանձնառու է մնում Իրանի հետ գործարքին, սակայն Իսլամական Հանրապետության քաղաքականության մեջ «ագրեսիվ միտումներ» են նկատվում, նշել է Մերկելը: Նրա խոսքով՝ ԵՄ եւ ԱՊԼ պետություններն այս ոլորտում պետք է համագործակցեն:
Բարձր մակարդակով երկօրյա հանդիպման գլխավոր նպատակն է դարձել Եվրամիության եւ Մերձավոր Արեւելքի, ԱՊԼ մեջ մտնող Հյուսիսային եւ Արեւելյան Աֆրիկայի երկրների միջեւ համագործակցության ամրապնդումը: Օրակարգի մեջ մտնող հիմնական թեմաներն են համատեղ պայքարն ապօրինի միգրացիայի եւ միջազգային ահաբեկչության դեմ, ինչպես նաեւ Սիրիայում, Եմենում, Լիբիայում եւ Մերձավոր Արեւելքում հակամարտությունների կարգավորումը: Գագաթնաժողովին մասնակցում են մոտ 50 պետությունների եւ կառավարությունների ղեկավարներ:
