Իրանի մայրաքաղաքում բախում է տեղի ունեցել ուժային կառույցների եւ ցուցարարների միջեւ: Ինչպես հայտնել է իրանական Kaleme ընդդիմադիր կայքը, բախումները տեղի են ունենում Թեհրանի համալսարանից ոչ հեռու, որտեղ այժմ հավաքվել են ընդդիմության առաջնորդները:
Կայքը հաղորդում է, որ Իրանի ուժային կառույցների ներկայացուցիչները քաղաքացիական հագուստով են: Լրատվամիջոցի տվյալներով, ցուցարարները գոչում են կարգախոսներ` հօգուտ իրանական ընդդիմության ներկայացուցիչներից մեկի` Միր Հոսեյն Մուսավիի, ով նախօրեին ձերբակալվել է ոստիկանների կողմից: Նա այլ ընդդիմադիրների հետ մեկտեղ ուղարկվել է Հեշմաթիյե բանտ:
Հիշեցնենք, որ Իրանում ներքաղաքական իրավիճակը սրվել է 2009 թվականի հունիսի 12-ին տեղի ունեցած նախագահական ընտրություններից հետո: Երկրի գործող նախագահ Ահմադինեժադը ընտրություններում հավաքել էր քվեների 60 տոկոսը, իսկ նրա հիմնական մրցակից, իրանական ընդդիմության առաջնորդ Մուսավին շուրջ 30 տոկոսը: Ընդդիմությունը մեղադրում է իշխանություններին ընտրությունների արդյունքները կեղծելու մեջ: Այդ ժամանակ բռնկված զանգվածային հուզումների հետեւանքով Թեհրանում մահացել է շուրջ 30 մարդ, հազարավոր մարդիկ ձերբակալվել են:
