Թուրքիայի իշխող՝ «Արդարություն եւ զարգացում» կուսակցության մամուլի քարտուղար Օմեր Չելիկը հայտարարել է, որ ձեռքբերվող ռուսական Ս-400 հրթիռային համակարգերը կպաշտպանեն ոչ միայն Թուրքիան, այլ նաեւ Եվրամիության եւ ՆԱՏՕ-ի անդամ երկրները, հաղորդում է ՌԻԱ Նովոստի-ն՝ հղում կատարելով Sputnik-ին:
Նա նշել է, որ Անկարան ստիպված էր տարբերակներ փնտրել իր հակաօդային պաշտպանությունն ուժեղացնելու համար, քանի որ ԱՄՆ-ի կողմից առաջարկված պայմանները ЗРК Patriot-ի գնման վերաբերյալ Թուրքիային չէին բավարարել:
Կուսակցության մամուլի քարտուղարը մեղադրել է ՆԱՏՕ-ին երկակի ստանդարտների մեջ: Նա նշել է, որ Հունաստանն առանց խոչընդոտների կարողացել էր ձեռքբերել ռուսական Ս-300 համակարգերը, իսկ Անկարան բախվում է դժվարությունների հետ՝ փորձելով ձեռքբերել Ս-400 համակարգերը: Նա ընդգծել է, որ Թուրքիան ինքնիշխան պետություն է եւ չի հանդուրժի, որ ինչ-որ մեկը թելադրի իր կարծիքը հակաօդային պաշտպանության ռուսական համակարգերի գնման վերաբերյալ:
Քաղաքական գործիչը հաստատել է, որ Ս-400 կմատակարարվի Թուրքիա ընթացիկ տարվա հուլիսին:
Այդ համակարգերի գնման մասին Թուրքիայի եւ Ռուսաստանի միջեւ բանակցությունները սկսվել էին 2016 թվականին: 2017 թվականին Մոսկվան հաստատել էր, որ կողմերը պայմանագիր են կնքել: Այդ ժամանակ Էրդողանը հայտնել էր, որ Թուրքիան արդեն կանխավճար է տրամադրել ռուսական համալիրների գնման համար:.
Միացյալ Նահանգները մինչ օրս փորձում են թույլ չտալ Թուրքիայի կողմից Ս-400 համակարգերի գնումը: Այսպես, չորեքշաբթի ԱՄՆ-ի փոխնախագահ Մայք Փենսը հայտարարել էր, որ պայմանագիրը լրջորեն անհանգստացնում է Վաշինգտոնին եւ վտանգ է ներկայացնում ՆԱՏՕ-ի ամբողջականությանը: Նա կոչ էր արել Անկարային ընտրել՝ կամ մնալ միության առանցքային գործընկերոջ դերում, կամ վտանգել այդ գործընկերության անվտանգությունը: Ի պատասխան՝ Թուրքիայի նախագահ Թայիփ Էրդողանը հայտարարել էր, որ գործարքը կատարված է: Նա հիշեցրել էր, որ ԱՄՆ-ը չէին ներկայացրել Անկարային նույնքան շահավետ պայմաններ Patriot համալիրի գնման դեպքում, որքան Մոսկվան:
