Րաֆֆի Հովհաննիսյանի պայքարը ոչ միայն ուշացել է երեք տարով, այլեւ որեւէ արդյունք չի տա: Այդ մասին NEWS.am-ի թղթակցի հետ զրույցում հայտարարել է Սոցիալ-դեմոկրատ հնչակյան կուսակցության ատենապետ, ընդդիմադիր Հայ ազգային կոնգրեսի անդամ Լյուդմիլա Սարգսյանը` մեկնաբանելով «Ժառանգություն» կուսակցության առաջնորդ Րաֆֆի Հովհաննիսյանի` ի նշան երկրում ստեղծված վիճակի դեմ բողոքի հայտարարած անժամկետ հացադուլը:
Սարգսյանի կարծիքով, նման վարմունքն անընդունելի է կուսակցության առաջին դեմքի համար: «Երեք տարի առաջ, երբ Հայ ազգային կոնգրեսը պահանջում էր Հայաստանի նախագահ Սերժ Սարգսյանի հրաժարականը, Րաֆֆի Հովհաննիսյանը կարծես համակերպվել էր այն մտքի հետ, որ Սերժ Սարգսյանը նախագահ է:
Ես շատ զարմացած եմ, որ այսօր իշխանությունն ու ոստիկանությունը հանդուրժողականություն դրսեւորեցին Հովհաննիսյանի նկատմամբ, որ նա հացադուլ է անում Ազատության հրապարակում: Երբ ես պարզապես զբոսնում էի Ազատության հրապարակում, ոստիկանության ներկայացուցիչներն ինձ, որպես իրական ընդդիմության ներկայացուցչի, ստիպեցին լքել տարածքը: Երբ ես հրաժարվեցի, ինձ բերման ենթարկեցին»,- ասաց ՍԴՀԿ ատենապետը:
Հարցին, թե որքանո՞վ արդյունավետ կլինի «Ժառանգության» առաջնորդի քայլը, Սարգսյանը նշել է, որ հացադուլը արդյունավետ քայլ չի համարում:
Նշենք, որ «Ժառանգություն» կուսակցության բաց համաժողովում Րաֆֆի Հովհաննիսյանը հայտարարել էր անժամկետ հացադուլ սկսելու մասին:
