Օգոստոսի 1-ին Արցախի Հանրապետության արտաքին գործերի նախարար Մասիս Մայիլյանի գլխավորած պատվիրակությունը Ավստրալիա կատարած աշխատանքային այցի շրջանակներում Սիդնեյում հանդիպել է Նոր Հարավային Ուելսի նահանգային խորհրդարանում Հայաստանի հետ բարեկամության խմբի հետ, որը ղեկավարում է նահանգի Oրենսդիր ժողովի խոսնակ Ջոնաթան Օ’Դեան։ Այս մասին NEWS-ին հայտնում են ԱՀ ԱԳՆ լրատվական ծառայությունից։
Մասիս Մայիլյանը ներկայացրել է Արցախի միջազգային ճանաչման եւ ապակենտրոնացված համագործակցության հաստատման գործընթացները՝ կարեւորելով 2012 թ. Նոր Հարավային Ուելս նահանգի խորհրդարանի կողմից Արցախի Հանրապետությունը ճանաչող բանաձեւի ընդունումը։ Արտաքին գործերի նախարարն ընդգծել է, որ նմանատիպ բանաձեւերի ընդունումը նշանակալի ներդրում է Արցախի միջազգային ճանաչման գործընթացում, ինչն իր հերթին նպաստում է հանրապետության անվտանգության ամրապնդմանը եւ տարածաշրջանում վերջնական խաղաղության հաստատմանը։
Հանդիպման ընթացքում կողմերը կարծիքներ են փոխանակել տարբեր ոլորտներում գործնական համագործակցության հաստատման հեռանկարների շուրջ՝ ազատության, ժողովրդավարության, օրենքի գերակայության եւ մարդու իրավունքների հարգման համընդհանուր արժեքների հավատարմության հիման վրա: Այս համատեքստում Արցախի արտգործնախարարն անդրադարձ է կատարել հանրապետությունում ժողովրդավարության եւ քաղաքացիական հասարակության զարգացման գործընթացին։
Հանդիպման մասնակիցների խնդրանքով Մասիս Մայիլյանը ներկայացրել է նաեւ ադրբեջանա-ղարաբաղյան հակամարտության խաղաղ կարգավորման գործընթացի ներկա փուլը։
Հանդիպման ընթացքում կողմերը կարեւորել են Ավստրալիայում Արցախի հետ բարեկամության շրջանակի ստեղծումը՝ համոզմունք հայտնելով, որ այն նշանակալի դերակատարություն կունենա Արցախի եւ Ավստրալիայի միջեւ հարաբերությունների զարգացման գործում։
