Հնչակյան կուսակցությունն առաջարկում է Համահայկական խորհուրդ ձեւավորել, որը պետք է համակարգի Հայրենիքի եւ Սփյուռքի կապերը, մշակի համագործակցության ավելի լայն ձեւաչափեր: Այս առաջարկը հնչել է մարտի 24-ին, Փարիզում ՍԴՀԿ պատվիրակության եւ Ֆրանսիայում Հայաստանի դեսպան Վիգեն Չիթեթչյանի հանդիպման ժամանակ:
ՍԴՀԿ Կեդրոնական վարչության ներկայացուցչությունը նկատել է, որ Համահայկական խորհուրդը պետք է ղեկավարի ՀՀ նախագահը, նրան մաս պետք է կազմի ԼՂՀ նախագահը, Սփյուռքում գործող ավանդական կուսակցությունները, գաղթօջախների ներկայացուցիչները, հայտնի հայեր:
ՍԴՀԿ մամուլի դիվանից NEWS.am-ին հայտնում են, որ ՍԴՀԿ պատվիրակության կազմում են եղել Կեդրոնական Վարչության ատենապետ Սեդրակ Աճեմյանը, անդամ Վահան Շիրխանյանը, Ֆրանսիայի շրջանի կուսակցության պատասխանատուները: Նրանք հանդիպումել են նաեւ Եկեղեցու Ֆրանսիայի թեմի առաջնորդ Նորվան արքեպիսկոպոս Զաքարյանի հետ եւ քննարկել Սփյուռքում Եկեղեցու դերը, հայապահպանման ծրագրերը, ինչպես նաեւ Հայաստանում եւ Սփյուռքում աղանդավորության դեմ պայքարի հնարավոր միջոցները:
Նշենք, որ այսօր` մարտի 25-ին Ֆրանսիայի Ազգային ժողովում տեղի կունենա խորհրդաժողով` «Կայունությունը, անվտանգությունն ու զարգացումը Հարավային Կովկասում թեմայով», որը կազմակերպել են ՍԴՀԿ-ն ու Հայ-Եվրոպական խորհուրդը: Խորհրդաժողովին կմասնակցեն ինչպես ֆրանսիացի, այնպես էլ հայ քաղաքական գործիչներ ու փորձագետներ:
