«Առավելագույն ճնշման» ԱՄՆ արշավը չի կարող Իրանին ստիպել վերադառնալ միջուկային բանակցությունների սեղանի շուրջ: NBC Nightly News-ին տված հարցազրույցում այս մասին ասել է Իրանի Ազգային անվտանգության բարձրագույն խորհրդի քարտուղար Ալի Շամհանին:
Նա նշել է, որ Իրանում կան մարդիկ, ովքեր կարծում են, որ 2015-ի միջուկային համաձայնագրի ստորագրումը սխալ էր: Շամհանին ԱՄՆ-ին անվանել է ագրեսոր և տարածաշրջանում լարվածության հիմնական աղբյուր եւ ԱՄՆ-ին կոչ է արել «իմաստուն գործել»:
Ըստ նրա, Իրանի դեմ Թրամփի վարչակազմի «առավելագույն ճնշման» արշավը չի ստիպի Թեհրանին նստել միջուկային բանակցությունների սեղանի շուրջ: «Քանի դեռ այս մոտեցումը օգտագործվում է Միացյալ Նահանգների կողմից, Իրանը երբեք չի բանակցի»:
Նա նշել է, որ Իրանի հասարակությունը վաղուց գործ ունի միջազգային պատժամիջոցների հետ եւ Իրանի փողոցներում տրամադրությունները ապացուցում են Թրամփի վարչակազմի քաղաքականության ձախողումը: «Ուղղակի շրջեք Թեհրանի փողոցներով եւ կտեսնեք, թե որքան աշխույժ են մեր մարդիկ, եւ դուք կհասկանաք, որ այն, ինչին ԱՄՆ-ն ձգտում էր, ձախողվել է»: