Հայազգի գործարարների գիտելիքները եւ պատկերացումները իրանական տնտեսության վերաբերյալ՝ մի կողմից, եւ ռուսաստանյան տնտեսական միջավայրի մասին՝ մյուս կողմից, կարող են խիստ արդյունավետ լինել համագործակցության համար։ Այս մասին Իրան-Հայաստան առեւտրական պալատի ներկայացուցիչների հետ հանդիպմանը ասել է ՀՀ էկոնոմիկայի նախարար Տիգրան Խաչատրյանը։
Նախարարը ներկայացրել Հայաստանի տնտեսության առանձնահատկությունները։ Նախարարը իրանական բիզնեսի՝ Հայաստանում գործունեություն ծավալելու տեսանկյունից կարեւորել է Հայաստանի աշխարհագրական դիրքը եւ մշակութային ընդհանրությունները հարեւան պետությունների միջեւ։
Տիգրան Խաչատրյանի խոսքով՝ հայազգի գործարարների գիտելիքները եւ պատկերացումները իրանական տնտեսության վերաբերյալ՝ մի կողմից, եւ ռուսաստանյան տնտեսական միջավայրի մասին՝ մյուս կողմից, կարող են խիստ արդյունավետ լինել համագործակցության համար։
Նախարարը կարեւորել է նաեւ Իրանի եւ ԵԱՏՄ-ի միջեւ կնքված ազատ առեւտրի ժամանակավոր համաձայնագրի առկայությունը։ Նախարար Խաչատրյանը ներկայացրել է ԵԱՏՄ-ում Հայաստանի անդամակցության արդյունքները եւ բացվող տնտեսական հեռանկարները։
Էկոնոմիկայի նախարարն անդրադարձել է նաեւ Հայաստանի տնտեսական միջավայրին․ «Կառավարության վերջին մեկ տարուց ավելի վարվող քաղաքականության առանցքային կետերից է շուկայում գործող եւ մեկնարկող բիզնեսի համար առավելագույն հավասարության ապահովումը։ Գործունեության յուրաքանչյուր բնագավառում նոր կազմակերպություն ստեղծելը եւ բիզնեսով զբաղվելը հավասարապես հասանելի է ցանկացած կազմակերպության համար, մրցակցային պայմանները հավասար են բոլորի համար: Կառավարության նպատակն է բացառել կոռուպցիայի որեւէ դրսեւորում այն հարաբերություններում, որոնք վերաբերում են պետական մարմինների եւ մասնավոր հատվածի միջեւ շփումներին», - ասել է Տիգրան Խաչատրյանը:
Իրան-Հայաստան առեւտրաական պալատի վարչության նախագահ Հերվիկ Եարիջանյանը շնորհակալություն է հայտնել նախարար Տիգրան Խաչատրյանին եւ ԻԻՀ-ում ՀՀ դեսպան Արտաշես Թումանյանին ընդունելության համար՝ ընդգծելով էկոնոմիկայի նախարարության հետ քննարկումների կարեւորությունը։ Պալատի ներկայացուցիչները նախարարին հարցեր են ուղղել Հայաստանում բիզնես գործունեություն ծավալելու առանձնահատկությունների, մաքսային ընթացակարգերի, հարկային կարգավորումների վերաբերյալ։
Տիգրան Խաչատրյանը նախարարության իրավասու պաշտոնյաներին հանձնարարել է պատվիրակության՝ Հայաստանում գտնվելու օրերին հետամուտ լինել նրանց հուզող հարցերի պարզաբանմանը եւ օժանդակել գործարար կապերի հաստատմանը։ Նախարարը հույս է հայտնել, որ գործարարներն արդյունավետ հանդիպումներ կունենան գործընկերների հետ, ինչը կհանգեցնի համատեղ բիզնես ծրագրերի իրականացմանը։