Միջատների թիվը մոլորակի մի շարք շրջաններում ավելի արագ է նվազում, քան համարվում էր նախկինում։ Մասնավորապես, Գերմանիայում վերջին 10 տարիներին դրանց տեսակների թիվը շատ տեղերում, օրինակ՝ մարգագետիններում եւ անտառային զանգվածներում, նվազել է գրեթե մեկ երրորդով։ Նման եզրակացության են եկել գիտնականները, որոնց եզրահանգումները հրապարակվել են Nature գիտական ամսագրում։ Այս մասին համառոտ տեղեկացրել է Անտառի, ձյան եւ լանդշաֆթի շվեյցարական դաշնային գիտահետազոտական ինստիտուտի (WSL) մամուլի ծառայությունը, տեղեկացնում է ՏԱՍՍ-ը։
Գիտնականները հավաքել են ավելի քան միլիոն միջատներ (մոտ 2700 տեսակ) գերմանական Բրանդենբուրգ, Թյուրինգիա եւ Բադեն Վյուրթենբերգ երկրամասերի 300 շրջաններում։ Նրանք ապացուցել են, որ շատ տեսակների թվաքանակը նվազում է։ Վերջին տարիներին ուսումնասիրված շրջաններում միջատների հետազոտվող տեսակներն առհասարակ չեն նկատվել։ Ե՛վ անտառներում, ե՛ւ մարգագետիններում փորձագետները հաշվել են մեկ երրորդով ավելի քիչ տեսակներ, քան 10 տարի առաջ։ Այդ գործընթացը նկատվել է արոտավայրերում, մարգագետիններում եւ անգամ պահպանվող անտառներում։
«Այսքան մասշտաբային կրճատումն ընդամենը 10 տարում մեզ համար անակնկալ էր։ Դա վախեցնող, բայց ավելի վաղ հետազոտություններում ներգրվող պատկեր է»,- ասել է գիտական նախագծի հեղինակներից՝ Մյունխենի համալսարանի պրոֆեսոր Վոլֆգանգ Վայսերը։
Միջատներն ամենից շատ պակասել են մարգագետիններում, որոնք շրջապատված են ինտենսիվ շահագործվող հողատարածքներով։ Միեւնույն ժամանակ, հատկապես տուժել են այն տեսակները, որոնք չեն կարողանում տեղափոխվել հեռավոր վայրեր։ Անտառներում, ընդհակառակը, ավելի քչացել են այն միջատները, որոնք հարմարվել են հեռավոր տեղափոխություններին, եւ գիտնականներն առայժմ չեն կարողանում միանշանակ բացատրել այս փաստը։
