Իսրայելը ծովային շրջափակում է մտցրել Գազայի հատվածում, ինչը նշանակում է ձկնորսության արգելք ծովափին, Գազայից իսրայելական տարածքի գնդակոծումից հետո, ՌԻԱ «Նովոստի»-ին ասել  է Պաղեստինի ձկնորսների ասոցիացիայի նախագահ Զաքարի Բեյքերը։

Բեյքերի խոսքով՝ «իսրայելական կողմը տեղեկացրել է ձկնորսության պաղեստինյան ասոցիացիային ծովը ձկնորսների համար փակելու մասին՝ մինչեւ հետագա տեղեկացում»։

Իսրայելական կողմը թույլ էր տալիս ձկնորսություն անել Գազայի հատվածի ափին 6-9 մղոն տարածության վրա (11,1-16,6 կիլոմետր)։

Վերջին ամիսներին ամենամեծ սրացումը պաղեստինյան անկլավի սահմանին տեղի ունեցավ իսրայելական ՌՕՈւ-ի կողմից Գազայում «Իսլամական ջիհադ»-ի հրամանատար Բախի Աբու ալ Աթայի ոչնչացումից հետո։ Իսրայելը նրա վրա է դնում իսրայելցի խաղաղ բնակիչների եւ զինվորականների դեմ հարյուրավոր ահաբեկչությունների պատասխանատվությունը։

Երեքշաբթի իսրայելական տարածքը ենթարկվել է ուժեղացված հրթիռակոծման Գազայից։ Գազայից հիսուն հրթիռային արձակում է գրանցվել իսրայելցի զինվորականների կողմից առավոտյան, դրանցից 20-ը որսացել է «Երկաթե գմբեթ» ՀՀՊ համակարգը։ Հրետակոծությունները շարունակվել են նաեւ ավելի ուշ։ Հրթիռակոծությունների նախազգուշացման համակարգերն ակտիվացվել են երկրի հարավում եւ կենտրոնում, ներառյալ այնպիսի խոշոր քաղաքները, ինչպիսին են Թել Ավիվը, Մոդիինը, Խոլոնը, Աշքելոնը եւ Ռիշոն լե Ցիոնը։