Իսրայելի իշխանությունները թույլատրել են Գազայի հատվածի քրիստոնյաներին գալ Երուսաղեմ եւ Արեւմտյան ափ՝ նշելու Սուրբ ծնունդը, տեղեկացվում է Իսրայելի պաշտպանության նախարարության՝ տարածքներում կառավարական գործունեության համակարգմամբ զբաղվող ստորաբաժանման (COGAT) հայտարարությունում, փոխանցում է ՌԻԱ «Նովոստի»-ն։
«COGAT գեներալ-մայոր Աբու Ռուքունը թույլատրել է Գազայի քրիստոնյա բնակչությանը՝ գալ Երուսաղեմ Սուրբ ծնունդը նշելու։ Երուսաղեմ եւ Արեւմտյան ափ մուտքի թույլտվությունները տրվելու են իրավիճակի գնահատականին համապատասխան՝ անվտանգության տեսակետից եւ առանց տարիքը հաշվի առնելու»,- ասվում է COGAT-ի թվիթերյան հայտարարությունում։
Ավելի վաղ տեղեկացվել էր, որ Պաղեստինի կաթոլիկ առաջնորդները Իսրայելի իշխանություններին կոչ են արել թողնել Գազայի հատվածի քրիստոնյաներին Բեթղեհեմ՝ Սուրբ ծնունդը նշելու նպատակով։
