Հայաստանում ներդրումներ կատարելուն խոչընդոտում են փակ սահմանները: Այս մասին հունվարի 8-ին լրագրողների հետ հանդիպման ժամանակ ասաց Կովկաս ինստիտուտի գիտաշխատող Հրանտ Միքայելյանը:
Նա նշեց, որ պակաս կարեւոր չէ նաեւ երկրի քաղաքական կայունությունը:
«Մենք առաջին կիսամյակում գրանցեցինք տնտեսական աճի դանդաղում, բայց երկրորդ կիսամյակում կտրուկ աճ տեղի ունեցավ անշարժ գույքի շուկայում եւ շատ այլ ոլորտներում, հատկապես արդյունաբերության մեջ»,- շեշտեց Միքայելյանը:
Նրա խոսքով՝ աճ գրանցվեց նաեւ այն բանի հաշվին, որ 2018 թվականին շատ օբյեկտներ պարզապես չէին գործում, իսկ արդեն 2019-ին կրկին սկսեցին գործել եւ ապահովեցին տնտեսության զգալի աճը:
«10-տոկոսանոց աճ է դիտվում նաեւ վերամշակման արդյունաբերության մեջ, եւ սա պայմանավորված է նաեւ ԵՏՄ-ին Հայաստանի անդամակցությամբ»,- պարզաբանեց փորձագետը՝ հավելելով, որ ունեցած տվյալների համաձայն՝ ԵՏՄ-ին Հայաստանի անդամակցության շնորհիվ ամեն տարի դիտվում է 1,5-տոկոսանոց տնտեսական աճ:
Նա նաեւ նշեց, որ երկրորդ կիսամյակում բավականին զգալի աճ է գրանցվել նաեւ արտահանման ուղղությամբ:
Ընդ որում՝ Միքայելյանը հայտարարեց, որ որոշակի աճ է գրանցվել նաեւ զբոսաշրջության ոլորտում՝ 12 տոկոս:
«Աճ է գրանցվել նաեւ ազարտային խաղերի եւ կից ոլորտներում: Ես, իհարկե, կարծում են, որ սա կարճատեւ կլինի, քանի որ, իմ կարծիքով, սա չի կարող երկար տեւել… Կառավարությունը պետք է աշխատի այս ոլորտում աճի կրճատմամբ եւ կանխմամբ, քանի որ թվում է, որ կան աճի միտումներ»,- շեշտեց փորձագետը:
