Վերակառուցման եւ զարգացման եվրոպական բանկը (ՎԶԵԲ) ծրագրում է 2020-ին Հայաստանում մոտ 100 մլն եվրոյի ներդրումներ կատարել: Այս մասին մամուլի ասուլիսի ժամանակ հայտարարել է Հայաստանում ՎԶԵԲ ղեկավար Դիմիտրի Գվինդաձեն:
Նա նշել է, որ դա մոտավոր թիվ է, իսկ իրական ծավալները կարող են հասնել 90 կամ 150-200 միլիոնի:
«Շատ բան կախված է նրանից, թե ինչ հնարավորություններ կունենանք ֆինանսական եւ տնտեսության իրական ոլորտներում, ինչպես նաեւ կախված է կայուն ներդրումների առկայությունից»,- ասել է Գվինդաձեն:
Խոսելով ներդրումային պորտֆելի մասին՝ նա նշել է, որ 90 տոկոսը մասնավոր հատվածում է: Նրա խոսքով՝ ՎԶԵԲ-ում մշտապես քննարկում են նոր ծրագրերի իրականացման հնարավորությունները: Հայաստանի հետ ՎԶԵԲ համագործակցության ռազմավարության համաձայն՝ բացի ավանդական ոլորտներից, ինչպես օրինակ՝ ֆինանսներ եւ էներգետիկա, բանկը ակտիվ կուսումնասիրի տրանսպորտի եւ քաղաքական ենթակառուցվածքների, տուրիզմի եւ անշարժ գույքի, առեւտրի եւ գյուղատնտեսության, ինչպես նաեւ տեղեկատվական եւ հեռուստահաղորդակցման տեխնոլոգիաների ոլորտներում հնարավորությունները:
