Ամերիկյան Twitter ընկերությունը, որը միկրոբլոգների համանուն ծառայության սեփականատեր է, աշխարհում իր բոլոր աշխատակիցներից պահանջել է տնից աշխատել՝ կապված նոր կորոնավիրուսից վարակման վտանգի հետ։ Համապատասխան հայտարարությունը հրապարակվել է չորեքշաբթի օրը, ընկերության կայքում, հայտնում է ՏԱՍՍ-ը։

«Մենք հասկանում ենք, որ սա աննախադեպ քայլ է, սակայն այժմ եկել են աննախադեպ ժամանակներ։ Մենք կշարունակենք հնարավոր ամեն բան անել, որպեսզի աջակցենք մեր հանրությանը»,- նշել է ընկերությունը։

Նա հիշեցրել է, որ մարտի 2-ին իր աշխպատակիցներին «խստորեն խորհուրդ է տվել» աշխատել դիստանցիոն ռեժիմով՝ տնից։

Twitter-ը սոցիալական ցանց է, որը թույլ է տալիս օգտատերերին փոխանակել կարճ հաղորդագրություններ, կազմակերպել հարցումներ, հրապարակել տարբեր նկարներ եւ տեսահոլովակներ։ Ծառայության ստեղծողներն են՝ Ջեկ Դորսին, Նոա Գլասը, Էվան Ուիլյամսը եւ Բիզ Սթոունը։ Առաջին գրառումը Twitter-ում հրապարակվել է 2006թ․ մարտի 21-ին։ Ամեն օր ծառայությունում մոտ 500 մլն «թվիթ» է հրապարակվում։