Կառավարության առաջարկած օրենսդրական նախաձեռնության էությունը զանգվածային լրատվության միջոցների տարածման գործընթացում ներգրավված անձանց եւ կազմակերպությունների գործունեության ժամանակավոր կարգավորման ապահովումն է: Այս մասին մարտի 23-ին ՀՀ Ազգային ժողովում պետաիրավական հարցերի մշտական խորհրդարանական հանձնաժողովի նիստին երկրորդ ընթերցմամբ Վարչական իրավախախտումների մասին օրենսգրքում եւ Քրեական օրենսգրքում փոփոխություններ կատարելու մասին օրենսդրական փաթեթի քննարկման ժամանակ ասաց ՀՀ արդարադատության նախարար Ռուստամ Բադասյանը:
Մասնավորապես, կառավարության կողմից արտակարգ դրության ժամանակահատվածում հաստատված պահանջների խախտման համար լրատվամիջոցները կտուգանվեն նվազագույն աշխատավարձի 100-ից 300-ապատիկի չափով: Բացի այդ, մեկուսացման կամ ինքնամեկուսացման ռեժիմի պահանջների խախտման համար քաղաքացուն սպառնում է տուգանք` նվազագույն աշխատավարձի 100-ից 250-ապատիկի չափով:
Իսկ եթե վարակված քաղաքացին միտումնավոր կերպով վարակել է մեկ այլ քաղաքացու կյանքի համար վտանգավոր վարակով, ապա նրա նկատմամբ տուգանք կկիրառվի նվազագույն աշխատավարձի 400-ից 800-ապատիկի չափով կամ կալանք` մինչեւ 1 ամիս ժամկետով, կամ ազատազրկում` մինչեւ 1 տարի ժամկետով:
Ընդ որում, եթե այս հանցագործությունը կատարվել է երկու կամ ավելի անձանց, անչափահասների կամ հղի կնոջ նկատմամբ, ապա քաղաքացին կտուգանվի նվազագույն աշխատավարձի է 800-ից 1000-ապատիկի չափով կամ կալանքով` 1-ից 3 ամիս ժամկետով, կամ ազատազրկմամբ՝ 1-ից 3 տարի ժամկետով: Եթե տվյալ գործողություններն անփութության հետեւանքով հանգեցրել են մարդու մահվան, ապա դրա համար մեղավոր վարակված քաղաքացին բանտ կուղարկվի` 3-ից 5 տարի ժամկետով:
Հիշեցնենք, որ փաթեթը հապշտապ կերպով ընդունվել էր խորհրդարանի կողմից առաջին ընթերցմամբ ուրբաթ ուշ երեկոյան:
