Եթե Հայաստանի Կառավարությունը ժամանակին չընդուներ համապատասխան միջոցառումներ, ապա պատկերը կլիներ բավականին անմխիթարական, քանի որ ըստ հաշվարկների՝ Երեւանում, բնակչության խտությունը եւ երթեւեկությունը հաշվի առնելով, մեկ մարդը կարող էր վարակել 2,4-2,6 մարդու: Այս մասին մարտի 30-ին ԱԺ արտահերթ նիստում «Արտակարգ դրության իրավական ռեժիմի մասին» օրենքում լրացումներ կատարելու մասին օրինագծերի փաթեթի արագացված ռեժիմով քննարկման ժամանակ ասաց Խորհրդարանի նախագահ Արարատ Միրզոյանը՝ դիմելով արդարադատության նախարար Ռուստամ Բադասյանին:
Ինչպես ի պատասխան նշեց նախարարը, պոտենցիալ վարակվածների ինդեքսը պահպանվելու դեպքում իրավիճակը բարձրակետին կհասներ վարակման առաջին դեպքից հետո 70-80 օր հետո: Այդ դեպքում միաժամանակ վարակվածների թիվը կարող էր կազմել բնակչության 89 տոկոսը, իսկ միաժամանակ հոսպիտալացված ծանր դեպքերի թիվը կանցներ 8200-ից: «Իրավիճակը ծանր է, սակայն առաջարկված նոր միջոցառումների արդյունքում ակնկալում ենք այդ ինդեքսի զգալի նվազում»,- ասաց Բադասյանը՝ հավելելով, որ այսօրվա դրությամբ վարակման ինդեքսը շուրջ 1,5 տոկոս է կազմում հենց ավելի վաղ կիրառված միջոցների եւ իրականացված միջոցառումների շնորհիվ:
Հիշեցնենք, որ Կառավարությունը՝ ի դեմս Արդարադատության նախարարության առաջարկել է իրականացնել քաղաքացիների շփումների առցանց վերահսկում: Օրնսդրական լրացումները նախատեսում են, որ այսպիսի պայմաններում Կառավարության կողմից նախատեսված համապատասխան մարմինները հասանելիություն կստանան տվյալներ հավաքելու հանրային էլեկտրոնային ցանցերից, այսինքն՝ քաղաքացիների գտնվելու վայրի, տեղաշարժի, նրանց համացանցային միացումների, շփումների եւ դրանց հետ կապված հեռախոսահամարների, համարների վերահասցեագրման, ինչպես նաեւ զանգերի, դրանց տեւողության, բայց ոչ բովանդակության մասին: Ընդ որում՝ հաղորդագրությունների եւ զանգերի բովանդակությունն անհասանելի է լինելու: Փոփոխությունները եւ քաղաքացիների անձնական տվյալները հավաքելու ու մշակելու հնարավորությունը տարածվելու է միայն ԱԴ ռեժիմի շրջանում, որը հայտարարվել է համավարակով պայմանավորված: Դրանից բացի, իշխանություններըն հասանելիություն են ստանալու քաղաքացիների բժշկական գաղտնիքին՝ վարակման, ստուգումների, հետազոտությունների տվյալներին:
