Կիրակի Սինգապուրի իշխանությունները սկսել են անվճար բաժանել բժշկական դիմակներ, երբ վարչապետ Լի Սյան Լուն մի քանի օր անց առաջին անգամ կոչ է արել բնակիչներին օգտագործել անհատական պաշտպանության այդ միջոցները նոր կորոնավիրուսի պանդեմիայի պայմաններում: Ըստ հաղորդագրության տեքստի՝ դիմակները կտարածվեն մինչեւ ապրիլի 12-ը, հաղորդում է ՏԱՍՍ-ը:
«Յուրաքանչյուր ընտանիք կկարողանա ստանալ դիմակներ ընտանիքի անդամների թվով՝ ավելացրած եւս մեկը»,-նշված է հայտարարության մեջ: Միաժամանակ հաղորդագրության մեջ նշված է, որ «դիմակները բազմանգամյա օգտագործման են, դրանք կարելի է լվանալ, արդուկել եւ կրկին օգտագործել»: «Վիրաբուժական դիմակներն այժմ ավելի անհրաժեշտ են նրանց համար, ովքեր գտնվում են կորոնավիրուսի դեմ պայքարի առաջնագծում»,-նշել են կառավարությունում:
Ապրիլի 3-ին վարչապետը ժողովրդին ուղղված հատուկ ուղերձում ընդգծել էր, որ իշխանություններն անհրաժեշտ են համարում դիմակներ կրելը, քանի որ հայտնվել են վիրուսով վարակվելու ասիմպտոմ նախադեպեր: Բացի այդ, կառավարության ղեկավարը հայտնել է լրացուցիչ սահմանափակումների մասին կորոնավիրուսի տարածման կապակցությամբ: Մասնավորապես, ապրիլի 7-ից քաղաք-պետությունում փակ կլինեն բոլոր հիմնական օբյեկտները, բացի կենսական անհրաժեշտություն ներկայացնողներից, որոնց շարքին են դասվում մթերային խանութները, դեղատները, հանրային տրանսպորտը. դադարեցված կլինեն դասերը դպրոցներում եւ բուհերում: Լի Սյան Լուն կոչ է արել բնակիչներին դուրս չգալ տնից առանց խիստ անհրաժեշտության: Մինչդեռ, նրա խոսքով, դա դեռ առաջարկի մակարդակում է, սակայն եթե իրավիճակը լբարելավվի, կառավարությունը պատրաստ է հետագա խիստ միջոցներ ձեռնարկել:
Նախօրեին Սինգապուրի իշխանությունները հայտնել էին կորոնավիրուսով վարակման 75 նոր դեպքերի մասին, որն ամենաբարձր ցուցանիշն է երկրում՝ սկսած հունվարի 23-ից: Այսօրվա դրությամբ՝ հանրապետությունում վարակվածների թիվը հասնում է 1.2 հազարի, վեց մարդ մահացել է:
Նոր կորոնավիրուսի բռնկումը գրանցվել էր 2019 թվականի դեկտեմբերի վերջում Կենտրոնական Չինաստանում: Առողջապահության համաշխարհային կազմակերպությունը մարտի 11-ին անվանել էր այն պանդեմիա: Ըստ վերջին տվյալների՝ աշխարհում վարակվել է ավելի քան 1.1 միլիոն մարդ, գրանցվել է ավելի քան 60 հազար մահ նոր տիպի կորոնավիրուսի հետեւանքով:
