Բարձր տեխնոլոգիական արդյունաբերության նախարարությունը ստացել է 280 առաջարկ՝ ի պատասխան ԹԱՕ սարքերի հարցով ՏՏ հանրույթին ուղղված նախարարության կոչին: Այս մասին ապրիլի 8-ին կառավարությկան մամուլի կենտրոնում կայացած ասուլիսի ժամանակ ասաց բարձր տեխնոլոգիական արդյունաբերության նախարար Հակոբ Արշակյանը:
Նրա խոսքով՝ վերջին 2 օրում բոլոր առաջարկներն ուսումնասիրվել են եւ դասակարգվել: «Մենք կարող ենք արձանագրել, որ այսօր նախարարությունը ստացել է ԹԱՕ 10 սարք, որոնք վերանորոգվել են եւ շահագործման համար պատրաստ են: Մենք պատրաստ ենք անհրաժեշտության դեպքում դրանք տրամադրելու առողջապահության նախարարությանը»,- հայտարարեց Արշակյանը:
Նա նշեց, որ գործընթացը շարունակվում է, նախարարությունն ամեն օր ստանում է զանգեր եւ հաղորդագրություններ ու դուրս գրված կամ չաշխատող ԹԱՕ սարքեր: Ստացված ամբողջ անսարք սարքավորումներն ուղարկվում են Ինժեներական քաղաք, որտեղ ԹԱՕ սարքերը վերանորոգվում են: Տասնյակ նամակներ են ստացվում նաեւ արտասահմանի մեր հայրենակիցներից՝ Լիբանանից, Ռուսաստանից, Գերմանիայից եւ ԱՄՆ-ից: «Անհրաժեշտության դեպքում նրանք պատրաստ են օգնություն ցույց տալ տեղական ինժեներներին նմուշներ եւ խորհրդակցություններ տրամադրելու առումով»,- հայտարարեց նա:
Նախարարը տեղեկացրեց, որ ներկայումս ԹԱՕ սարքերի վերաբերյալ մեծ ծավալի տեղեկություններ են ստացվում, ասվում է, որ դրանք հեշտ է արտադրել, սակայն այն սարքերը, որոնց մասին խոսք է գնում, դրած խնդիրը չեն լուծում, ավելին՝ կարող են հիվանդին նույնիսկ վնաս հասցնել: «Այս սարքերը մեծ մասամբ արտադրված են 3D պրինտերով եւ դրված խնդիրը չեն լուծում: Իրականում ԹԱՕ սարքերը պետք է հագեցած լինեն ներկառուցված խոնավության եւ տաքացման համակարգով, տարբեր համակարգերով եւ սենսորներով՝ գնահատելու համար պացիենտի վիճակը, անհրաժեշտության դեպքում սարքը պետք է կանգ առնի կամ բժիշկներին համապատասխան ազդանշան տա: Սա լուրջ սարքավորում է, այլ ոչ թե օդ ներմղող պոմպ: Նման սարքերի նախագծումը լուրջ գործընթաց է, ուստի ես կոչ եմ անում, որ մենք այս հարցին ավելի լրջորեն վերաբերվենք: Այս հարցը չի լուծվում մեկ շաբաթում կամ ամսում, նույնիսկ չլիցենզավորված, բայց գործող սարք ապահովելու համար»,- հայտարարեց նա:
Հայաստանում գոյություն ունեցող արտադրությունների, ինժեներական ընկերությունների, ինստիտուտների եւ կայացած գիտահետազոտական խմբերի ներկայացուցիչները պատարստակամություն են հայտնել մասնակցելու ԹԱՕ սարքերի նախագծմանը, լաբորատոր թեստավորմանը, ԹԱՕ սարքերի պահեստամասերի եւ այլ տարրերի արտադրությանն ու արտահանմանը: Նախարարը խոստացավ լրացուցիչ ներկայացնել, թե նախարարությունն ինչպիսի արդյունքներ է ակնկալում այս բոլոր գործընթացներից եւ ինչ ուղղությամբ են շարժվելու:
