Հնդկաստանի Թելանգանա նահանգի բնակչուհին երեք օրում ավելի քան 1.4 հազար կիլոմետր է անցել` հարեւան նահանգից իր որդուն վերցնելու համար, որն այնտեղ էր մնացել կորոնավիրուսի համաճարակի կապակցությամբ հայտարարված մեկուսացման ռեժիմի պատճառով, հայտնում է «ՌԻԱ Նովոստի»-ն` վկայակոչելով India Today-ը:
Միայնակ մայր Ռազիա Բեգումը աշխատում է Նիզամաբադ քաղաքի պետական դպրոցում, որը գտնվում է Թելանգանա նահանգի հյուսիսում, ունի երկու որդի: Նրանցից մեկը ավարտել է ինժեներական ֆակուլտետը, երկրորդը սովորում է` բժիշկ դառնալու համար եւ մարտի կեսերին ուղեւորվել էր դեպի Անդհրա Պրադեշ նահանգի հարավ-արեւելքում գտնվող Նելուրու քաղաք` ընկերոջ հիվանդ հորն օգնելու համար:
Դրանից կարճ ժամանակ անց Հնդկաստանի կառավարությունը հայտարարել էր 21 օրով` մինչեւ ապրիլի 14-ը, մեկուսացման ռեժիմի ներդրման մասին: Իշխանությունները երկրի բնակիչներին հորդորել են առանց խիստ անհրաժեշտության փողոց դուրս չգալ, սահմանափակել հասարակական տրանսպորտի, տաքսի ծառայությունների, մետրոյի եւ երկաթուղիների աշխատանքը: Մինչեւ ապրիլի 14-ը դադարեցվել են նաեւ բոլոր ներքին եւ միջազգային ավեիաչվերթները:
«Դա կնոջ համար փոքրիկ սկուտերով դժվար ճանապարհորդություն էր: Բայց որդուս վերադարձնելու վճռականությունը հաղթահարեց իմ բոլոր վախերը: Սարսափելի էր գիշերով ճանապարհներով ընթանալը, որտեղ ավտոմեքենաներ եւ մարդիկ չկան»,- ասել է կինը, որը ոստիկանությունից այս ճանապարհորդության ընթացքում հարեւան նահանգների սահմանները հատելու թույլտվություն էր ստացել:
Հնդկաստանի իշխանությունները շաբաթ քննարկելու են նոր կորոնավիրուսով հիվանդացածների թվի աճի հետ կապված երկրում մեկուսացման ռեժիմի երկարացման հարցը. այսօրվա տվյալներով՝ երկրում կա 6412 հիվանդ: Այս թիվ ներառվում է բուժում ստացող 5709 մարդու, 503 առողջացածների, 199 մահացածների եւ կորոնավիրուսով մեկ մարդու, որը ներգաղթել է երկրի սահմաններից դուրս:
Առողջապահության համաշխարհային կազմակերպությունը մարտի 11-ին COVID-19 նոր կորոնավիրուսային ինֆեկցիայի բռնկումը համավարակ էր հայտարարել: ԱՀԿ վերջին տվյալներով՝ աշխարհում գրանցվել է վարակման արդեն ավելի քան 1,4 մլն դեպք, 85,5 հազարից ավելի մարդ մահացել է: