Մեծ Բրիտանիայի վարչապետ Բորիս Ջոնսոնը դուրս է գրվել հիվանդանոցից այնտեղ կորոնավիրուսային հիվանդությամբ մեկ շաբաթ անցկացնելուց հետո, գրում է Express and Star պարբերականը։
Ընդ որում՝ Դաունինգ սթրիթում հայտարարել են, որ կառավարության ղեկավարն անմիջապես չի կարողանա վերադառնալ իր պարտավորությունների կատարմանը բժիշկների խորհրդով եւ կանցնի վերականգնման կուրս Բաքինգեմշիրում՝ քաղաքից դուրս իր նստավայրում։
«Վարչապետը դուրս է գրվել հիվանդանոցից, որպեսզի շարունակի բուժումը Չեքերսում (վարչապետի ամառանոցային նստավայր)։ Բժիշկների խորհրդով՝ վարչապետն անմիջապես չի վերսկսի աշխատելը։ Նա ցանկանում է շնորհակալություն հայտնել բոլորին Սուրբ Թոմասի հիվանդանոցում փայլուն խնամքի համար։ Նրա մտածում է մարդկանց մասին, որոնք հիվանդացել են կորոնավիրուսով»,-հայտարարել է Ջոնսոնի մամուլի քարտուղարը։
Հիշեցնենք, որ Բորիս Ջոնսոնը հոսպիտալացվել էր անցած կիրակի 10 օրվա ընթացքում չդադարող կորոնավիրուսային ախտանշաններով։ Այնուհետեւ նա բուժվել էր ինտենսիվ թերապիայի բաժանմունքում, սակայն կարճ ժամանակ անց տեղափոխվել էր սովորական պալատ։ Բորիս Ջոնսոնը խոստովանել է, որ պարտական է բժիշկներին իր կյանքով։