Եվրահանձնաժողովը ավիաընկերություններին պարտավորեցրել է վերադարձնել գումարներն այն թռիչքների համար, որոնք հնարավոր չի եղել իրականացնել համավարակի պատճառով: Այսպիսով, Բրյուսելը մերժել է վաուչերների ծրագիր մտցնելու նախաձեռնությունը, հայտնում է ՌԳ-ն՝ վկայակոչելով Journal պարբերականը:
«Մենք չենք կարող դատել յուրաքանչյուրի ֆինանսական վիճակի մասին... այդ իսկ պատճառով մենք պնդում ենք, որ ուղեւորն իրավունք ունի (թռիչքի համար դրամական փոխհատուցում ստանալ), եւ վերջ»,- հայտարարել է ԵՀ գործադիր փոխնախագահ Մարգրետե Վեստագերը, ով Բրյուսելում համակարգում է մրցակցության հարցերը:
Ըստ նրա՝ այս հարցում երկու կարծիք լինել չի կարող. եվրոպական օրենսդրությունը հստակ կարգավորում է կողմերի պարտավորությունները: ԵՄ 261/2004 կանոնակարգի համաձայն՝ փոխադրողը պարտավոր է գումարը վերադարձնել ուղեւորին կամ մեկ շաբաթվա ընթացքում նրան նոր տոմս տրամադրել:
Այս որոշումը ֆինանսական խնդիրների ալիք է բարձրացնելու այն փոխադրողների համար, ովքեր առաջարկում էին վճարումները չվերթների համար փոխարինել վաուչերներով: Տարեսկզբից նրանց եկամուտները կտրուկ նվազել էին, իսկ աշխատավարձերի վճարման եւ օդանավակայանների ծառայությունների դիմաց լիզինգային վճարումների կատարման անհրաժեշտությունը ոչ ոք չի չեղարկել: