![](img/news/58/01/20/default.jpg)
Իսպանիայի վարչապետ Պեդրո Սանչեսը ներողություն է խնդրել համաքաղաքացիներից՝ կարանտինի նոր փուլի եւ սխալների համար, որոնք հանգեցրել են խիստ որոշումների անհրաժեշտության։ Երկրի իշխանությունները կրկին երկարաձգել են արտակարգ միւջոցառումների գործողությունը, սակայն այս անգամ՝ 15 օրով, ոչ թե 30, ինչպես պլանավորվել էր, հայտնում է Euronews-ը։
«Համավարակի զարգացումը ստիպում է մեզ շրջահայաց լինել։ Բարձր պատրաստականության ռեժիմը կգործի, քանի դեռ անհրաժեշտություն կա զոհաբերելու որոշ ազատություններ հանուն մարդկանց առողջության, եւ ոչ մի օր ավելի։ Ես կուզեի ներողություն խնդրել քաղաքացիներից այն սխալների համար, որ կատարվել են շտապողականության եւ ոչ բավարար պաշարների պատճառով, քանի որ ճգնաժամը չի ունեցել նախադեպը եւ հասել է հսկայական ծավալների»,- նշել է նա։
Ռեժիմը, որի մասին խոսվում է, չի որոշակիացնում մեկուսացման միջոցառումները, սակայն թույլ է տալիս իշխանություններին սահմանափակել որոշ ազատություններ, օրինակ՝ արգելել ազատ տեղաշարժը։
Կարանտինը հանում են աստիճանաբար, թեեւ ոչ բոլոր շրջաններում միաժամանակ։ Թագավորությունում վիճակագրությունը անընդհատ բարելավվում է։ Այսպես, արդեն չորս օր անընդմեջ կորոնավիրուսից մահերի օրական թիվը չի գերազանցում 100-ը։