Բելգիացի արքայազն Իոահիմը, ով մայիսի վերջին Իսպանիա ուղեւորության ժամանակ վարակվել էր կորոնավիրուսով, խոստովանել է, որ չի պահպանել մեկուսացման կանոնները, հայտնում է «Ռիա Նովոստի»-ն՝ հղում անելով RTBF հեռուստաալիքին։
28-ամյա արքայազնը, ով բելգիացիների թագավոր Ֆիլիպի զարմիկը եւ արքայադուստր Աստրիդի որդին է, իր փաստաբանի միջոցով տարածել է հայտարարաություն, որում «իր անկեղծ ափսոսանքը եւ բոլոր հետեւանքները կրելու պատրաստակամությունն է հայտնել»։
Իսպանական ԶԼՄ-ների տեղեկատվությամբ՝ արքայազն Իոահիմը մայիսի 24-ին ժամանել է Մադրիդ՝ ուսումնական պրակտիկայի, սակայն նույն օրը մեկնել է Կորդովա, որտեղ մայիսի 26-ին գնացել է ընկերների եւ հարազատների մոտ՝ երեկույթի։ Հավաքին մասնակցել է 27 հյուր, թեեւ Իսպանիայում սահմանափակումները հանելու շրջանակներում թույլ են տվել մինչեւ 15 մարդու մասնակցությւամբ միջոցառումներ։
Հաջորդ օրը արքայազնը կորոնավիրուսի ախտանիշներ է զգացել եւ մայիսի 28-ին COVID-19-ի թեսթի դրական պատասխան է ստացել։
Անդալուզիայի իշխանությունները արձանագրել են մասնակիցների թվով խախտման մասին եւ նամակ են ուղարկել համապատասխան մարմիններին։
Իսպանացիները, որոնք Եվրոպայում կորոնավիրուսի ամնենադաժան բռնկումներից մեկն են ապրել, բացասական են վերաբերել բելգիացի արքայազնի անպատասխանատու արարքին։
