ՀՀ քաղաքացիները կասկածամտորեն են վերաբերվում համաճարակի դեմ պայքարում իշխանությունների քայլերին: Այս մասին վկայում են «Ժողովրդի ձայնը» փորձագիտական ակումբի կողմից անցկացված օնլայն հարցման արդյունքները: Հարցմանը մասնակցել է ՀՀ 1700 քաղաքացի՝ սոցցանցերի 18 տարեկանից բարձր օգտատերեր:
Պատասխանելով «ինչպե՞ս եք գնահատում կորոնավիրուսի դեմ պայքարում ՀՀ իշխանությունների ձեռնարկած միջոցները» հարցին՝ հարցվածների 25%-ը արդյունավետ է գնահատել: 56%-ը կարծում է, որ դրանք բավարար չեն, իսկ 19%-ը դրանք անարդարացիորեն կոշտ է անվանել:
Պատասխանելով «ի՞նչ ազդեցություն է ունեցել համաճարակը երկրի սոցիալ-տնտեսական դրության վրա» հարցին, հարցվածների 15%-ը նշել է աշխատանքի եւ բիզնեսի կորուստը: 4%-ը բողոքել է, որ իր բիզնեսը գոյատեւում է, իսկ 8%-ն ասել է, որ իրենց գործատուն չվճարվող արձակուրդի է ուղարկել: 48%-ի մոտ կտրուկ նվազել են եկամուտները, իսկ 25%-ի համար երկրի սոցիալ-տնտեսական դրությունը չի փոխվել: