ԵՄ բարձրաստիճան պաշտոնյան առցանց հարթակներին, ինչպիսիք են Google-ը եւ Facebook-ը, կոչ է արել ուժեղացնել պայքարը կեղծ լուրերի դեմ, մասնավորապես այնպիսի երկրներից, ինչպիսիք են Չինաստանը եւ Ռուսաստանը: Ընդ որում, նա բարձր է գնահատել ԱՄՆ նախագահ Դոնալդ Թրամփի փաստերը ստուգելու Twitter-ի մոտեցումը, հայտնում է AP-ը։
Հրապարակելով կորոնավիրուսի հետ կապված ապատեղեկատվության դեմ պայքարի պլանը՝ Եվրահանձնաժողովի փոխնախագահ Վերա Ժուրովան ասել է, թե ցանկանում է, որ տեխնոլոգիական ընկերությունները մանրամասն ամսական զեկույցներ ներկայացնեն կեղծ լուրերը կանխելու ուղղությամբ իրենց ձեռնարկած գործողությունների վերաբերյալ: ԵՄ-ն պնդում է, որ «օտարերկրյա սուբյեկտները եւ որոշ երրորդ երկրներ, մասնավորապես՝ Ռուսաստանը եւ Չինաստանը, մասնակցել են ԵՄ-ում, նրա հարեւան երկրներում եւ ամբողջ աշխարհում ազդեցության նպատակաուղղված գործողություններին ու ապատեղեկատվական քարոզարշավներին»։
Ժուրովան բարձր է գնահատել այն առցանց ընկերություններին, որոնք ստորագրել են կամավոր օրենսդրություն՝ ուղղված վիրուսի հետ կապված ապատեղեկատվության տարածումը դադարեցնելուն, սակայն ասել է, որ սա միայն առաջին քայլն է, եւ որ «բարելավման հնարավորություն կա»:
Նա հերքել է այն ենթադրությունները, որ ԵՀ-ն ծրագրում է կարգավորել հենց ապատեղեկատվությունը․ «Ես չեմ ուզում ճշմարտության նախարարություն ստեղծել»։
Ընդ որում, նա բարձր է գնահատել Twitter-ի մոտեցումը, երբ նա Թրամփի երկու թվիթների հանդեպ փաստերի ստուգման նախազգուշացում էր տեղադրել: «Ես սատարում եմ Twitter-ի արձագանքը նախագահ Թրամփի թվիթներին»,- լրագրողներին ասել է Ժուրովան: «Նրանք չեն ջնջել դա: Բոլորս դա տեսնում ենք: Նրանք փաստերով ստուգված տեղեկատվություն են տրամադրել»:
ԱՄՆ խոշոր տեխնոլոգիական ընկերությունները հայտարարել են, որ աջակցում են ԵՄ նոր ծրագրերին:
