2019 թվականին Հայաստանը շարունակել է զարգացնել արժեքավոր համագործակցություն ԵՄ-ի հետ, ինչպես նաեւ՝ փոխշահավետ համագործակցությունը Եվրամիության երկրների եւ եվրոպական մայրցամաքի գրեթե բոլոր երկրների հետ: Այս մասին հունիսի 10-ին մշտական խորհրդարանական հանձնաժողովների համատեղ նիստին 2019 թվականի պետական բյուջեի կատարողականի վերաբերյալ զեկույցի քննարկմանն ասաց ՀՀ արտաքին գործերի նախարար Զոհրաբ Մնացականյանը:
Նրա խոսքով՝ չափազանց կարեւոր է ապահովել քաղաքական երկխոսության առկայությունը ԵՄ-ի հետ Համապարփակ եւ ընդլայնված գործընկերության համաձայնագրի հիման վրա: «Հայաստանում ժողովրդավարական ազատությունների զարգացման համար անհրաժեշտ է աջակցել պետական կառույցներին, ինչպես նաեւ՝ համագործակցություն տարբեր ոլորտներում: 2019 թվականին զգալիորեն աճել է Եվրոպական Միության կողմից Հայաստանին տրամադրվող ֆինանսական աջակցությունը: Մենք նաեւ բարձր ենք գնահատում ԵՄ աջակցությունը Հայաստանին նոր տեսակի կորոնավիրուսի դեմ պայքարի այս դժվարին ժամանակահատվածում եւ համավարակի հետեւանքով առաջացած սոցիալ-տնտեսական հետեւանքների կանխարգելման գործում»,- շեշտեց Մնացականյանը:
