Եվրոպական երկրների՝ Իսպանիայի, Պորտուգալիայի եւ Հունաստանի կողմից Հայաստանի հետ համապարփակ եւ ընդլայնված գործընկերության մասին Համաձայնագրի վավերացման համար քաղաքական խոչընդոտներ չկան: Այս մասին այսօր՝ հունիսի 11-ին, ԱԺ մշտական հանձնաժողովների համատեղ նիստում 2019-ի պետբյուջեի կատարողականի մասին զեկույցի քննարկման ընթացքում հայտարարեց ՀՀ ԱԳ նախարար Զոհրաբ Մնացականյանը՝ պատասխանելով պատգամավորների հարցերին:
Նախարարի խոսքով՝ ԵՄ-Հայաստան համաձայնագիրը մնում է Եվրամիության հետ հարաբերությունների իրավական հիմք: «Դա կարեւոր գործիք է ՀՀ կառավարության կողմից ընդունված բարեփոխումների ծրագրերի իրականացման համար: Այսօր մենք մոտ ենք վավերացման գործընթացի ավարտին: Մենք ակնկալում ենք Համաձայնագրի վավերացում Իսպանիայի, Պորտուգալիայի եւ Հունաստանի համար: Եվ դրա համար քաղաքական որեւէ խնդրի չկա»,-ասաց Մնացականյանը:
Նա նաեւ նշեց, որ կորոնավիրուսի պայմաններում Ավստրիան եւ Իտալիան արդեն ավարտին են հասցրել տվյալ Համաձայնագրի վավերացումը:
