Հայաստանը եւ Ռուսաստանը սերտ համագործակցության մեջ են համավարակին դիմակայելու գործում։ Այս մասին առցանց մամուլի ասուլիսում հունիսի 11-ին հայտարարեց Հայաստանում Ռուսաստանի արտակարգ եւ լիազոր դեսպան Սերգեյ Կոպիրկինը։
Նրա խոսքերով՝ կորոնավիրուսի դեմ պայքարի սկզբնական փուլում Հայաստանին են փոխանցվել 1500 թեսթեր, իսկ դրանից հետո «Ռոսպոտրեբնադզորը», ընդհանուր առմամբ, 40 000 հետազոտություն անցկացնելու համար Երեւանին երկու խմբաքանակ ռեգենտներ փոխանցելու որոշում է կայացրել։
Դեսպանը հիշեցրեց նաեւ ռուսական ախտորոշիչ լաբորատորիայի մասին, որտեղ մինչ այժմ անցկացվել է 7000 թեսթ։ «Բացի այդ, «Ռոսպոտրեբնադզորը» վերջերս հայտնել է Հայաստանում հետազոտությունների լրացուցիչ ֆինանսավորման մասին»,- նշեց նա։ Կոպիրկինն ընդգծեց ռուսական կապիտալով ընկերությունների կարեւոր դերը Հայաստանում կորոնավիրուսի եւ դրա հետեւանքների դեմ պայքարում։ «Մի շարք ընկերություններ, այդ թվում՝ «Հարավ-կովկասյան երկաթգիծը», ՎՏԲ բանկը, «Հայաստանի էլեկտրական ցանցերը», մեծ միջոցներ են փոխանցել Հայաստանում կորոնավիրուսի դեմ պայքարի հաշվին։
Ստեղծվել են համավարակի հետեւանքներից տուժածների աջակցության հիմնադրամներ»,- պարզաբանեց դիվանագետը՝ հավելելով, որ Ռուսաստանը Հայաստանին ակտիվորեն օգնում է նաեւ ՄԱԿ-ի գծով։ Նա ընդգծեց, որ համաճարակաբանական իրավիճակը չի խանգարում հեռավար քննարկումներ անցկացնել երկու երկրների խորհրդարանականների եւ կառավարության ներկայացուցիչների միջեւ։ «Միաժամանակ, ստեղծված իրավիճակը ստիպել է տնտեսական համագործակցության միջկառավարական հանձնաժողովի եւ միջխորհրդարանական հանձնաժողովի նիստերը տեղափոխելու որոշում կայացնել»,- եզրափակեց Կոպիրկինը։
