Բնական է, որ այս ընթացքում մեծ աշխատանքներ են տարվում պատվաստանյութ ձեռք բերելու ուղղությամբ եւ տեսականորեն այդ պատվաստանյութը կարող է ստեղծվել 3 ամսից, բայց կարող է նաեւ առաջիկա 3 տարիներին չստեղծվել։ Այս մասին այսօր՝ հունիսի 12-ին, ԱԺ ելույթում ասաց ՀՀ վարչապետ Նիկոլ Փաշինյանը։
«Այստեղ էլ մենք պետք է առաջնորդվենք՝ հույս ունեցիր լավագույնի, բայց պատրաստվիր վատթարագույնի սցենարով։ Ամեն օրվա կորոնավիրուսի մեր թվերն արձանագրում են, թե մենք ինչպես ենք պահել հակահամաճարակային կանոնները 7-ից 14 օրվա ընթացքում։ Թվերից պարզ է դառնում, որ մենք հակահամաճարակային կանոնները չենք պահպանել պատշաճ մակարդակով»,- ասաց վարչապետը։
Նիկոլ Փաշինյանի կարծիքով՝ Հայաստանում պետք է սկսվի հակահամաճարակայի շարժում. «Եթե ֆորմալ ինչ-որ զրոյական կետից է պետք սկսել, կարծում եմ՝ այսօրվա մեր հանդիպումը կարող է լինել այդ սիմվոլիկ զրոյական կետը։ Ինքս պարտավորվում եմ՝ որպես նախկինում այդ կանոններն պատշաճ չպահպանած մարդ, որի ապացույցն այն է, որ ես վարակվեցի կորոնավիրուսով, անձամբ ճշգրտորեն պահպանել հաստատված բոլոր կանոններն՝ առանց բացառության։ Պետք է լինի այնպես, որ այդ կանոնների չպահպանումը համարվի ամոթ։ Սա մեկ շաբաթվա կամ մեկ տարվա խնդիր չէ, մենք պետք է հարմարվենք խնդրի իրողություններին եւ նոր աշխարհին»։
