Կիեւի Վերաքննիչ դատարանը չեղարկել է 2014 թվականի փետրվարին զանգվածային սպանությունների կազմակերպման մասին գործով Ուկրաինայի նախկին նախագահ Վիկտոր Յանուկովիչի՝ հեռակա կալանքը որպես խափանման միջոց ընտրելու մասին որոշումը՝ այն ուղարկելով վերաքննման: Որոշումը կապված է Ինտերպոլի հետախուզության բազայում Ուկրաինայի նախկին նախագահի բացակայության եւ նման խափանման միջոցի համար հիմքերի անբավարար լինելու հետ, հաղորդում է ՏԱՍՍ-ը: Այս մասին գործակալությանն ասել է «Ավեր Լեքս» փաստաբանների միավորումը, որի իրավաբանները ներկայացնում են Յանուկովիչի շահերը:
«Վերաքննիչ դատարանը չեղարկել է «մայդանի» մասին գործում կալանքը որպես խափանման միջոց ընտրելու մասին քաղաքականապես մոտիվացված որոշումը, այն ուղարկվել է վերաքննման առաջին ատյանի դատարան»,-ասել է փաստաբան Վիտալի Սերդյուկը:
Պաշտպանությունը հավելել է, որ Յանուկովիչի կալանքի մասին որոշումը, որը թվագրված է ս.թ. մայիսի 12, ընդունվել է Կիեւի Պեչերսկի շրջանային դատարանի կողմից «քրեադատավարական օրենսդրության բազմաթիվ խախտումներով»:
Յանուկովիչին Ուկրաինայում մեղավոր են ճանաչել պետական դավաճանության եւ ագրեսիվ պատերազմի ծրագրմանը, նախապատրաստմանը, ծավալմանը նպաստելու մեջ: Նա հեռակա կարգով դատապարտվել է 13 տարվա ազատազրկման: Ինքը՝ Յանուկովիչը, մեղքը չի ընդունում եւ դատավճիռն անօրինական է համարում:
2014 թվականի փետրվարի 20-ին Կիեւի Ինստիտուսկի փողոցում «մայդանի» իրադարձությունների ժամանակ հրաձգություն է սկսվել ինքնությունը չհաստատված անձանց, այդ թվում դիպուկահարների կողմից, ինչի հետեւանքով զոհվել է 53 մարդ: Կիեւում փետրվարի 18-20-ին բախումների զոհ է դարձել ավելի քան 80 մարդ, հարյուրավոր մարդիկ վիրավորվել են: Զոհվածների թվում են եղել նաեւ «Բերկուտ» հատուկ ստորաբաժանման զինյալները: Տարբեր գնահատականների համաձայն՝ 2014 թվականի ձմռանը Կիեւում բախումների ժամանակ զոհվել է ուժային կառույցների 18-23 ներկայացուցիչ: Եվս 919 ուժային համարվում է տուժած, նրանցից 140-ը հրազենային վնասվածք է ստացել: Ընդ որում, խաղաղ բնակիչների սպանության մեջ մեղադրվել են հատուկ նշանակության ջոկատայինները, իրավապահների նկատմամբ հանցագործությունները չեն հետաքննվում: