Վերականգնելով Արեւմտյան Հայաստանի հայկական պատմական հուշարձանները՝ Թուրքիայի իշխանությունները խեղաթյուրում են ոչ միայն շինության ճարտարապետական տեսքը, այլ նաեւ՝ պատմական փաստերը։ Հունիսի 1-ին տեղի ունեցած մամուլի ասուլիսի ժամանակ այս մասին հայտարարեց հուշարձանագետ Սամվել Կարապետյանը՝ ավելացնելով, որ հենց այս թեմային է նվիրված «ՎԱՐՁՔ» ամսագրի չորրորդ համարը։
Որպես իր խոսքերի ապացույց, Կարապետյանը բերեց Հովվի կամուրջն Էրզրումում։ «Պատմական աղբյուրները վկայում են, որ կամուրջը կառուցվել է 1160 թվականին՝ Գրիգոր Պահլավունու կողմից։ Կամուրջի վրա այդ մասին հայատառ գրություն է եղել։ Սակայն այժմ գրությունն անհետացել է»,- ասաց նա։ Կարապետյանի խոսքով, թուրքերն ավելի առաջ են գնացել եւ զբոսաշրջիկների համար նախատեսված ցուցանակների վրա գրել են, որ կամուրջը կառուցվել է 1297-1298 թվականներին՝ ոմն Գազան Խանի կողմից:
Ճարտարապետ Աշոտ Հակոբյանի կարծիքով, հայկական ճարտարապետական հուշարձանները վերականգնելու ժամանակ թուրքերը, չունենալով բավարար մակարդակի գիտելիքներ, չեն կարողանում եւ չեն ցանկանում շինությունները վերականգնել իրենց նախկին տեսքով։