2020թ․ Խաղաղության Նոբելյան մրցանակի դափնեկիր՝ ՄԱԿ Պարենի համաշխարհային ծրագիրը (ՊՀԾ) մտավախություն ունի, որ «սովի համավարակ» կսկսվի՝ նույնիսկ ավելի լուրջ հետեւանքներով, քան կորոնավիրուսի համավարակը: Այս մասին Նոբելյան մրցանակի հանձնման արարողության ժամանակ հայտարարել է ՊՀԾ գործադիր տնօրեն Դեւիդ Բիզլին, հայտնում է RFI-ը:
«Բազմաթիվ պատերազմների, կլիմայի փոփոխության, որպես քաղաքական եւ ռազմական զենք՝ սովի համընդհանուր օգտագործման եւ համավարակի պատճառով, որը վատթարացնում է այս ամենը երկրաչափական պրոգրեսիայով, 270 միլիոն մարդ կարող է սովի եզրին հայտնվել»,- առցանց արարողության ժամանակ նախազգուշացրել է Բիզլին: Ըստ նրա՝ «սովի համավարակը» կմթագնի քովիդի հետեւանքները: Լավ նորությունն այն է, որ միասին մենք կարող ենք կանխել դա, հավելել է Նոբելյան մրցանակակիր կազմակերպության ղեկավարը:
ՄԱԿ Պարենի համաշխարհային ծրագիրը 2020 թվականի հոկտեմբերի 9-ին հայտարարվել է Խաղաղության Նոբելյան մրցանակի դափնեկիր: ՄԱԿ-ի 1961թ. ստեղծված ծրագիրը այս մրցանակին արժանացել է ոչ միայն սովի դեմ պայքարում ունեցած ներդրման համար: Նորվեգական Նոբելյան կոմիտեն նշել է նաեւ հակամարտությունների գոտում խաղաղության հասնելու նրա ջանքերը եւ սովը որպես պատերազմի զենք օգտագործելը կանխելու ուղղությամբ իրականացվող աշխատանքը: ՄԱԿ ՊՀԾ-ի կայքում նշվում է, որ սա աշխարհի ամենամեծ մարդասիրական կազմակերպությունն է, որը կյանքեր է փրկում արտակարգ իրավիճակներում:
Այս տարվա Նոբելյան մրցանակաբաշխությունն անցկացվել է ոչ թե ինչպես սովորաբար Օսլոյի քաղաքապետարանում բարձրաստիճան պաշտոնյաների ներկայությամբ, այլ հեռակա կարգով: Դեւիդ Բիզլին հանդես է եկել կազմակերպության հռոմեական կենտրոնակայանից:
