Հայաստանի Ազգային անվտանգության ծառայությունը չի հերքել եւ չի հաստատել վրացական մի շարք լրատվամիջոցների կողմից տարածած տեղեկատվությունն այն մասին, թե Վրաստանի խորհրդարանի նախկին խոսնակ Նինո Բուրջանաձեի ամուսինը՝ ՆԳ նախկին փոխնախարար Բադր Բիցաձեն, գտնվում է Հայաստանի տարածքում։
«Այս հարցի առնչությամբ որեւէ տեղեկություն չունենք»,- NEWS.am-ի թղթակցին ասաց ԱԱԾ մամուլի քարտուղար Արծվին Բաղրամյանը։
Հայաստանի ոստիկանությունում եւս հրաժարվեցին մեկնաբանել այս հարցը՝ վկայակոչելով «ոչ կոմպետենտությունը»։
Նշենք, որ Բիցաձեին մեղադրել են իշխանություններին զինված դիմադրության եւ զանգվածային անկարգությունների կազմակերպման մեջ: Ավելի վաղ Վրաստանի ՆԳՆ-ն տարածել էր ընդդիմադիրների հեռախոսազրույցը, որտեղ նրանք քննարկում էին ոստիկանության դեմ պայքարի մարտավարությունը:
Վրացական «Ռեզոնանսի» պարբերականը հայտնել էր, որ Բադրի Բիցաձեն թաքնվում է Հայաստանում: Թերթը մանրամասները չի հաղորդում, սակայն, հենվելով սեփական աղբյուրների վրա, նկատում է, որ Բիցաձեն լքել է Վրաստանը դեռ կիրակի:
