Կորոնավիրուսի դեմ Moderna-ի պատվաստանյութը երկրորդն է, որ ԱՄՆ-ում շտապ կիրառելու համար ստացել է Սննդամթերքի եւ դեղորայքի որակի սանիտարական հսկողության վարչության հավանությունը, հայտնում է Reuters-ը:
Ենթադրվում է, որ առաջիկա օրերին կսկսվեն Moderna-ի պատվաստանյութի ներարկումները երկրի 18 եւ մեծ տարիքի բնակիչներին:
«COVID-19-ի կանխարգելման համար երկու պատվաստանյութերի առկայության շնորհիվ Սննդամթերքի եւ դեղորայքի որակի սանիտարական հսկողության վարչությունը եւս մեկ կարեւոր քայլ կատարեց այս գլոբալ համավարակի դեմ պայքարում, որն ամեն օր ԱՄՆ-ում հանգեցնում է մեծ թվով հոսպիտալացումների եւ մահերի»,- իր հայտարարության մեջ նշել է գերատեսչության ղեկավար Սթիվեն Հանը:
Սպասվում է, որ պատվաստում է անցկացվելու նաեւ այնպիսի դժվար հասանելի վայրերում, ինչպես՝ գյուղական հիվանդանոցները: Պատվաստանյութը պետք է պահպանվի եւ ուղարկվի սառեցված վիճակում, բայց չի պահանջում չափազանց բարձր սառը ջերմաստիճան, ինչպես Pfizer/BioNTech-ի պատվաստանյութը:
Պատվաստանյութի մշակման արագությունը (ԱՄՆ-ում նոր կորոնավիրուսսի առաջին դեպքի հայտնաբերման պահից սկսած մեկ տարուց պակաս) ապշեցուցիչ գիտական հաջողություն է, չնայած բնակչության շրջանում կասկածներ կան:
«Ես հույս ունեմ, որ բոլոր ամերիկացիները կպաշտպանեն իրենց՝ պատվաստում ստանալով, երբ պատվաստանյութը նրանց հասանելի լինի: Այդպես մեր երկիրը կսկսի ապաքինվել եւ առաջ շարժվել»,- հայտարարել է ԱՄՆ գլխավոր վարակաբան Էնթոնի Ֆաուչին:
Պատվաստանյութն աարտադրող ընկերությունից հայտարարել են, որ պատրաստվում են հայտ ներկայացնել 2021 թվականին ԱՄՆ-ում ամբողջական լիցենզիան ստանալու համար:
