Ռուսաստանը մեկ շաբաթով դադարեցնում է Մեծ Բրիտանիայի հետ ավիահաղորդակցությունը կորոնավիրուսի նոր շտամի հայտնաբերման կապակցությամբ: Ինչպես հայտնել են COVID-19-ի դեմ պայքարի օպերատիվ շտաբից, սահմանափակումներն ուժի մեջ կմտնեն 2020 թվականի դեկտեմբերի 22-ին, ժամը՝ 00:00-ից, հաղորդում է Ինտերֆաքս-ը:
Շտաբի տեղեկություններով՝ Մեծ Բրիտանիայում կորոնավիրուսի նոր շտամի հայտնաբերման շուրջ իրավիճակը մանրակրկիտ ուսումնասիրվում է, ինչի արդյունքում կկայացվեն հետագա որոշումները:
Հաղորդագրության մեջ նշվում է, որ Ռոսպոտրեբնադզորը շարունակում է ուսումնասիրել նոր կորոնավիրուսի գենետիկ փոփոխությունները Ռուսաստանի տարածքում եւ աշխարհում, որոնք ունակ են ազդել հարուցչի նույնականացման, COVID-19-ի բուժման եւ կանխարգելման վրա: Անհրաժեշտության դեպքում կձեռնարկվեն լրացուցիչ միջոցառումներ, խոստանում է օպերատիվ շտաբը:
Մեծ Բրիտանիայում հայտնաբերվել է N501Y կորոնավիրուսի նոր տարատեսակը, որն ունի տարածման բարձր արագություն: Գիտնականները դեռեւս չունեն տվյալներ այն մասին, թե արդյոք նոր COVID-19-ն ունի մահացության ավելի բարձր տոկոս կամ արդյոք պատվաստանյութերը կազդեն այդ վիրուսի կանխարգելմանը:
Մեծ Բրիտանիան 16 երկրների թվին է պատկանում, որի հետ ՌԴ-ն բացել էր իր օդային սահմաններն ու վերականգնել կանոնավոր ավիահաղորդակցությունը: Մոսկվայի եւ Լոնդոնի միջու կանոնավոր չվերթներ իրականացնում են «Աէրոֆլոտ» եւ British Airways ավիաընկերությունները:
ԵՄ մի շարք երկրներ արդեն կոչ են արել կասեցնել Մեծ Բրիտանիայի հետ ավիահաղորդակցությունը: Այդ օրինակին հետեւում են նաեւ որոշ ոչ եվրոպական երկրներ:
Ավելի վաղ Ռուսաստանում ուղիղ ներդրումների հիմնադրամի ղեկավար Կիրիլ Դմիտրիեւը հավաստիացրել էր, որ «Սպուտնիկ V» ռուսական պատվաստանյութն արդյունավետ է կորոնավիրուսի՝ Եվրոպայում հայտնաբերված նոր մուտացիայի դեմ: