Իսրայելի կառավարությունն ուրբաթ օրը հեռախոսային քվեարկության ընթացքում հաստատել է երկու շաբաթ տեւողությամբ 2020-ի սկզբից ի վեր երրորդ տոտալ կարանտինի ընդունումը` կորոնավիրուսի հետագա տարածումը կանխելու համար: Այս մասին հայտնում է հրեական պետության առողջապահության նախարարության մամուլի ծառայությունը:
«Կառավարությունն այսօր հեռախոսային քվեարկության ընթացքում հաստատել է հետեւյալ կանոնները, որոնք ուժի մեջ կլինեն 14 օրվա ընթացքում` 2020 թվականի դեկտեմբերի 27-ի ժամը 17:00-ից մինչեւ 2021 թվականի հունվարի 9-ը. արգելվում է բնակության վայրից հեռանալն ավելի քան հազար մետրով` բացառությամբ պատվաստումների, բժշկական կամ սոցիալական օգնություն ստանալու, ցույցերին կամ դատական գործընթացներին մասնակցության, սպորտով զբաղվելու նպատակով քայլելու համար. արգելվում է լքել բնակության վայրը` մեկ այլ անձի բնակության վայրում գտնվելու նպատակով. բոլոր մանրածախ կետերը եւ հանրային վայրերը պետք է փակվեն` բացառությամբ առաջին անհրաժեշտության ապրանքների, սննդի եւ հիգիենայի պարագաների վաճառքի խանութների»,- ասվում է հայտարարության մեջ, փոխանցում է ՏԱՍՍ-ը: