ԱՄՆ ընտրված նախագահ Ջո Բայդենը եւ ապագա առաջին տիկին Ջիլ Բայդենն իրենց սուրբծննդյան ուղերձի շրջանակում շնորհակալություն են հայտնել պատվաստանյութի շուրջ աշխատող բժիշկներին եւ գիտնականներին, հաղորդում է ՏԱՍՍ-ը:
«Ես եւ Ջիլը գիտենք, որ ծայրահեղ դժվար տարի էր բազմաթիվ ամերիկացիների համար,-նշել է Բայդենը:-Մեր բազմաթիվ համաքաղաքացիներ հնարավորություն չունեն գտնել աշխատանք, կերակրել ընտանիքը, վճարել տան վարձերը կամ հիպոթեքը: Սակայն մենք պետք է հիշենք, որ մեր ընդհանուր խնդիրը միմյանց մասին հոգ տանելն է: Մենք պետք է օգնենք միմյանց եւ լինենք բարեգթության ու հույսի աղբյուր»:
«Մենք խորին շնորհակալություն ենք հայտնում արտակարգ ծառայությունների եւ առաջին օգնության աշխատակիցներին, որոնք աշխատել են առաջնագծում՝ վտանգելով սեփական կյանքը,-նշել է քաղաքական գործչի տիկինը:-Մենք նաեւ երախտապարտ ենք գիտնականներին եւ հետազոտողներին, որոնք աշխատել են պատվաստանյութի ստեղծման շուրջ»: Բայդենները նաեւ շնորհակալություն են հայտնել զինծառայողներին:
Դեմոկրատը հերթական անգամ կոչ է արել ամերիկացիներին հրաժարվել ուղեւորություններից եւ խուսափել մարդկանց կուտակումներից Սուրբ Ծննդյան տոնի ժամանակ: «Դա անհրաժեշտ է մեր ընտանիքների անվտանգության համար»,-նշել է Բայդենը՝ ընդգծելով, որ նա իր տիկնոջ հետ եւս հրաժարվել են բարեկամներին այցելություններից:
Ջոն Հոփքինսի համալսարանի տվյալներով՝ ԱՄՆ-ում համավարակի ամբողջ ընթացքում հայտնաբերվել է կորոնավիրուսով վարակման ավելի քան 18,68 դեպք, մահացել է 329 355 մարդ: Երկու ցուցանիշներով էլ երկիրը զբաղեցնում է աշխարհում առաջին հորիզոնականը:
