Ֆրանսիայի կառավարությունը նախազգուշացրել է հունվարյան տոներից հետո COVID-19 «համաճարակի անվերահսկելի վերսկսման» հավանականության մասին, հայտնում է «Գազետա»-ն՝ վկայակոչելով Figaro-ն:
«Գիտական խորհուրդը (Ֆրանսիայի կառավարությանն առընթեր) հնարավոր է համարում, որ վարակման թվի նման աճը մի քանի շաբաթվա ընթացքում համաճարակի անվերահսկելի վերսկսման, հոսպիտալացման դեպքերի ուժեղ աճի, ինտենսիվ թերապիայի բաժանմունքներ ընդունման եւ մահվան դեպքերի կհանգեցնի»,- ասվում է հաղորդագրության մեջ:
Գիտական խորհուրդն այս սպառնալիքին արձագանքելու երկու հնարավոր սցենար է առաջարկել: Առաջին տարբերակն արձագանքելն է, երբ վարակման դեպքերի թիվը տոներից հետո աճի: Դա սոցիալական կամ տնտեսական գործունեության սահմանափակում է ենթադրում, որը կարող է նպաստել վիրուսի տարածմանը: Երկրորդ տարբերակը նույնիսկ ավելի ուշ արձագանքելն է` հիմնվելով նոր հոսպիտալացումների թվի վրա: Այս տարբերակն «ավելի լայն սահմանափակող միջոցառումներ է ներառում, այդ թվում` երկարատեւ ինքնամեկուսացում»:
Իրավիճակը բարդացնում է ֆրանսիացիների մեծամասնության անվստահությունը պատվաստանյութի նկատմամբ: Ֆրանսիացիների միայն 40 տոկոսն է պատրաստ պատվաստվել կորոնավիրուսի դեմ, մինչդեռ երկրում պատվաստումների առաջին երեք օրվա ընթացքում հարյուրից պակաս մարդ է իմունիզացվել: