Չինական Շիցզյաչժուան (Հեբեյ նահանգի վարչական կենտրոն) եւ Սինգթայ (Հեբեյ նահանգ) քաղաքների բոլոր բնակիչներին կարգադրվել է չլքել իրենց տներն առաջիկա շաբաթվա ընթացքում, հայտնում է «Սինհուա»-ն: Լոքդաունի մասին որոշումը կայացվել է վերջին մեկ շաբաթվա ընթացքում նահանգում կորոնավիրուսով վարակման 127 դեպքի հայտնաբերման կապակցությամբ:
Շիցզյաչժուանի թաղամասերից մեկը համաճարակաբանական բարձր ռիսկայնություն ունեցող տարածք է ճանաչվել, իսկ մնացածը որպես միջին ռիսկայնություն ունեցող տարածքներ են դասակարգվել: Շիցզյաչժուանում շուրջ 11 միլիոն մարդ է ապրում, իսկ Սինգթայում (նաեւ ենթակա շրջաններում)` ավելի քան 7 միլիոն մարդ:
COVID-19- ի տարածումն արգելափակելու համար Շիցզյաչժուանի իշխանությունները հունվարի 9-ին դադարեցրել են հասարակական տրանսպորտի` ավտոբուսների, տաքսիների եւ մետրոյի աշխատանքը:
Բացի այդ, իշխանությունները խստացրել են վերահսկողական միջոցառումները Շիցզյաչժուանի երկաթուղային կայարաններում. ուղեւորներին արգելվում է մուտք գործել կայարան եւ գնացքներ նստել, ինչպես նաեւ խորհուրդ է տրվում վերադարձնել տոմսերը, հաղորդում է ՌԲԿ-ն: