Գերմանիայի կանցլեր Անգելա Մերկելը վստահ է, որ կորոնավիրուսի դեմ պատվաստումների տեմպը, որոնք երկրում սկսվել են 2020 թվականի դեկտեմբերի վերջին, միայն կաճի: Այս մասին քաղաքական գործիչը հայտարարել է 2021 թվականի իր առաջին փոդքասթում, փոխանցում է DW-ն:
«Սա դանդաղ մեկնարկ է: Բայց մի քանի հարյուր հազար մարդ արդեն պատվաստվել է, եւ ամեն օր նրանց թիվն ավելանում է: Պատվաստումների տեմպը կավելանա»,- ասել է Մերկելը: Ընդ որում, նա ընդգծել է, որ Գերմանիայում պատվաստանյութերը բավարար կլինեն` բոլորին պատվաստելու համար: Ավելի վաղ` հունվարի 6-ին, երկրի առողջապահության նախարար Յենս Սպանը խոստացել էր, որ մինչ ամառ այդպիսի հնարավորություն կունենան Գերմանիայի բոլոր բնակիչները:
Հունվարի 9-ի փոդքասթում Մերկելը կողմ է հանդես եկել պատվաստանյութերի ձեռքբերման եի բաշխման միասնական եվրոպական ռազմավարությանը: «Վիրուսը, որից տուժում են բոլորը, ոչ մի երկիր չի կարող ինքնուրույն հաղթահարել: Ոչ մի պետություն, այդ թվում` Գերմանիան, հուսալիորեն պաշտպանված չի լինի վիրուսից, քանի դեռ դրանից պաշտպանված չեն հարեւաններն ու ընկերները»,- ասել է նա:
Կանցլերի խոսքով ՝ ձմռան առաջիկա շաբաթներն ամենադժվարը կլինեն համավարակի ամբողջ ընթացքում: Այս կապակցությամբ նա ընդգծել է լոքդաունի ռեժիմի պահպանման կարեւորությունը, որը երկրում կգործի առնվազն մինչեւ հունվարի 31-ը: Այդ կարանտինային սահմանափակումները նա «խիստ, բայց անհրաժեշտ» է անվանել:
Համարվում է, որ այս կամ այն վարակիչ հիվանդության նկատմամբ զանգվածային իմունիտետի ապահովման համար անհրաժեշտ է դրա դեմ պատվաստել երկրի բնակչության առնվազն 60 տոկոսը: ԵՄ քվոտաների համաձայն` Գերմանիան արդեն կորոնավիրուսի դեմ պատվաստանյութի 1.3 միլիոն դեղաչափ է ստացել: Սակայն մինչ այժմ պատվաստվել է ընդամենը 476.959 մարդ:
